करमाळा | प्रतिनिधी :
दिल्लीतील विद्यार्थी आंदोलनादरम्यान विद्यार्थ्यांवर झालेल्या कथित लाठीहल्ल्याच्या निषेधार्थ वंचित बहुजन आघाडीने पुकारलेल्या करमाळा बंदला राष्ट्रवादी काँग्रेस (शरदचंद्र पवार गट)ने जाहीर पाठिंबा दिला आहे. पक्षाचे नेते संतोष वारे यांनी आंदोलनाला पूर्ण ताकदीने समर्थन देण्याची घोषणा केली.
याबाबत प्रतिक्रिया देताना संतोष वारे म्हणाले की, “विद्यार्थी हे देशाचे भविष्य आहेत. आपल्या हक्कांसाठी शांततापूर्ण आणि लोकशाही मार्गाने आंदोलन करणाऱ्या विद्यार्थ्यांवर झालेला कथित लाठीहल्ला निषेधार्ह आहे. या घटनेविरोधात वंचित बहुजन आघाडीने दिलेल्या बंदच्या हाकेला राष्ट्रवादी काँग्रेस (शरदचंद्र पवार गट)चा पूर्ण पाठिंबा आहे. या अन्यायाविरोधात आम्ही रस्त्यावर उतरून लढा देऊ.”
या बंदच्या माध्यमातून केंद्र शासन आणि दिल्ली पोलीस प्रशासनाच्या कथित कारवाईचा निषेध नोंदविण्यात येणार असल्याचे सांगण्यात आले. तसेच करमाळा शहरातील व्यापारी, व्यावसायिक आणि नागरिकांनी बंदमध्ये सहभागी होण्याचे आवाहन करण्यात आले आहे.
दरम्यान, दिल्लीतील विद्यार्थी आंदोलन आणि त्यानंतर झालेल्या पोलिस कारवाईच्या पार्श्वभूमीवर राज्यातील विविध राजकीय पक्ष आणि संघटनांकडून आंदोलन तसेच निषेध नोंदविण्यात येत आहे.
