छत्रपती संभाजीनगर | प्रतिनिधी
शालेय स्तरावर विद्यार्थ्यांमध्ये व्यसनांविषयी जागरूकता निर्माण करून व्यसनमुक्त समाज घडविण्याच्या उद्देशाने श्री शिवाजी हायस्कूल व प्राथमिक शाळा, कोकरपुरा येथे मुक्ताई व्यसनमुक्ती व मानसिक आरोग्य केंद्राच्या वतीने व्यसनमुक्ती जनजागृती कार्यक्रम उत्साहात पार पडला. विद्यार्थ्यांनी या उपक्रमाला उत्स्फूर्त प्रतिसाद देत व्यसनमुक्त राहण्याची सामूहिक शपथ घेतली.
कार्यक्रमाला शाळेचे प्राचार्य गौतम कोंडीबा आढाव, पर्यवेक्षक रवींद्र सखाराम चिंचोले, शिक्षक व शिक्षकेतर कर्मचारी उपस्थित होते. तसेच मुक्ताई व्यसनमुक्ती केंद्राचे संस्थापक-अध्यक्ष डॉ. सुनील नागरगोजे, सौ. सुमन नागरगोजे, समुपदेशक गायकवाड मॅडम, पवार मॅडम, अविनाश शिपे आणि केंद्रातील सहकारी उपस्थित होते.
कार्यक्रमात विद्यार्थ्यांना व्यसन म्हणजे काय, त्याचे शारीरिक, मानसिक, सामाजिक आणि शैक्षणिक जीवनावर होणारे दुष्परिणाम याविषयी सविस्तर मार्गदर्शन करण्यात आले. तसेच तंबाखू, गुटखा, सिगारेट, मद्य आणि अमली पदार्थांपासून दूर राहण्याचे महत्त्व, चुकीच्या संगतीपासून सावध राहण्याची गरज आणि उज्ज्वल भविष्यासाठी योग्य निर्णय घेण्याबाबत विद्यार्थ्यांना माहिती देण्यात आली.
यावेळी परिसरातील व्यसनाधीन व्यक्तींची लक्षणे ओळखणे, त्यांना उपचारासाठी प्रोत्साहित करणे आणि व्यसनमुक्त समाज घडविण्यात प्रत्येक नागरिकाची भूमिका किती महत्त्वाची आहे, याबाबतही विद्यार्थ्यांशी संवाद साधण्यात आला.
कार्यक्रमाच्या शेवटी विद्यार्थ्यांनी आयुष्यात कोणत्याही प्रकारच्या व्यसनाला बळी पडणार नाही तसेच कुटुंब, मित्रपरिवार आणि समाजात व्यसनमुक्तीचा संदेश पोहोचविण्यासाठी प्रयत्नशील राहण्याची सामूहिक शपथ घेतली.
विद्यार्थ्यांमध्ये व्यसनांविषयी जागरूकता निर्माण करून निरोगी, सुदृढ आणि व्यसनमुक्त समाज घडविण्यासाठी हा उपक्रम प्रेरणादायी ठरल्याची भावना उपस्थितांनी व्यक्त केली.
