पनवेल|प्रतिनिधी|श्रीनाथ(गणेश) लाड|: महिलांच्या सार्वजनिक सुविधा, सुरक्षितता आणि महिला उद्योजकांच्या प्रश्नांकडे प्रशासनाचे लक्ष वेधण्यासाठी मनसे पनवेल महानगर महिला सेनेच्या वतीने पुढाकार घेण्यात आला. मनसे पनवेल महानगराध्यक्ष सौ. स्वरूपा संजय सुर्वे यांच्या पुढाकाराने पनवेल महानगरपालिका आयुक्तांची भेट घेऊन महिलांच्या विविध प्रश्नांबाबत दोन महत्त्वाची निवेदने सादर करण्यात आली.
पनवेल महानगरपालिका क्षेत्रातील गर्दीची ठिकाणे, बाजारपेठा, बसस्थानके तसेच महिलांची मोठ्या प्रमाणात वर्दळ असलेल्या परिसरांमध्ये स्वच्छ, सुरक्षित आणि पुरेशा संख्येने सार्वजनिक शौचालये उपलब्ध करून द्यावीत, अशी मागणी पहिल्या निवेदनाद्वारे करण्यात आली. महिलांच्या दैनंदिन गरजा आणि सुरक्षिततेच्या दृष्टीने सार्वजनिक स्वच्छतागृहांची सुविधा अत्यावश्यक असल्याचे मनसे महिला सेनेने प्रशासनाच्या निदर्शनास आणून दिले.
दुसऱ्या निवेदनाद्वारे शासनाच्या माध्यमातून पनवेल महानगरपालिका क्षेत्रातील महिलांना उपलब्ध करून देण्यात आलेल्या फूड ट्रक व्यवसायाबाबत महत्त्वाची मागणी करण्यात आली. महिला उद्योजिकांच्या फूड ट्रकवर वारंवार कारवाई करून त्यांना त्रास देण्याऐवजी महानगरपालिकेने त्यांच्या व्यवसायासाठी निश्चित आणि अधिकृत जागा उपलब्ध करून द्यावी, अशी भूमिका मनसे महिला सेनेने मांडली.
या महिला आपल्या व्यवसायातून मिळणाऱ्या उत्पन्नातून फूड ट्रकचे हप्ते भरत आहेत. त्यामुळे वारंवार कारवाई करण्याऐवजी त्यांना व्यवसायासाठी योग्य जागा उपलब्ध करून देणे, हा महिला स्वावलंबनाला प्रोत्साहन देणारा सकारात्मक मार्ग असल्याचे महिला सेनेने स्पष्ट केले.
तसेच स्थानिक महिलांच्या फूड ट्रकवर कारवाई केली जात असताना इतर राज्यांतील व्यक्तींच्या फूड ट्रकवरही समान नियमांनुसार कारवाई करण्यात यावी, अशी मागणी करण्यात आली. प्रशासनाने सर्व व्यावसायिकांसाठी समान नियम आणि समान निकष लागू करावेत, अशी भूमिका यावेळी मांडण्यात आली.
यावेळी पनवेल महानगराध्यक्ष श्री. योगेश चिले, पनवेल महानगर सचिव श्री. पराग बाजार, पनवेल महानगर सचिव महिला अॅड. अशिता पाटील, पनवेल उपशहर अध्यक्ष सौ. साक्षी दळवी, श्री. रोहन पाटील, कळंबोली उपशहर अध्यक्ष श्री. राहुल चव्हाण, नवीन पनवेल उपशहर अध्यक्ष श्री. संदीप जाधव, खारघर उपशहर अध्यक्ष श्री. लक्ष्मण वानखेडे तसेच नवीन पनवेल विभाग अध्यक्ष श्री. अंकुर पाटील उपस्थित होते.
महिलांच्या मूलभूत सुविधा, सुरक्षितता आणि आर्थिक स्वावलंबनासाठी महिला सेनेचा संघर्ष यापुढेही सुरूच राहील, असा निर्धार यावेळी व्यक्त करण्यात आला.
