श्री संत मोतीराम महाराज पुण्यतिथी महोत्सवानिमित्त ज्ञानेश्वरी पारायण समितीचा उपक्रम
लोहा : प्रतिनिधी
पवित्र श्रावण महिन्याच्या पार्श्वभूमीवर श्री संत मोतीराम महाराज पुण्यतिथी महोत्सवानिमित्त ज्ञानेश्वरी पारायण समिती, जुना लोहा यांच्या वतीने लोहा ते श्रीक्षेत्र फळा या पायी दिंडी सोहळ्याचे आयोजन करण्यात आले. भक्तिमय वातावरणात दिंडीचे उत्साहात प्रस्थान झाले.
जुना लोहा येथील श्री विठ्ठल-रुक्मिणी मंदिरात श्रावण महिन्यानिमित्त दरवर्षी ग्रंथराज श्री ज्ञानेश्वरी पारायण तसेच श्री संत मोतीराम महाराज पुण्यतिथी महोत्सव भक्तिभावाने साजरा केला जातो. याच परंपरेचा भाग म्हणून लोहा ते श्रीक्षेत्र फळा पायी दिंडी सोहळ्याची सुरुवात सुमारे ३० वर्षांपूर्वी ज्ञानेश्वरी पारायण समितीच्या वतीने करण्यात आली होती.
‘ज्ञानोबा माऊली तुकाराम’च्या जयघोषात निघणाऱ्या या दिंडीत दरवर्षी अनेक भाविक सहभागी होतात. शांतीब्रह्म ह.भ.प. आत्माराम महाराज रामेजवार यांच्या नेतृत्वाखाली दिंडीचे नियोजन करण्यात येते.
लोहा, सुनेगाव, सातेगाव पाटी, पेठशिवनी, पालम मार्गे श्रीक्षेत्र फळा असा या पायी दिंडीचा प्रवास आहे. मार्गातील विविध ठिकाणी भाविकांकडून दिंडीतील वारकऱ्यांची सेवा केली जाते.
दिंडीच्या प्रस्थानावेळी ज्ञानेश्वरी पारायण समितीचे सदस्य, बबरू पाटील पवार, गोपाल सावकार कवठेकर, रामजी मामा, वीणा प्रमुख, चोपदार सोनाजी वड, माधव भोस्कर, नागोराव केंद्रे, पिंटू डांगटे, नामानंद रामेजवार, पत्रकार रमेश पवार, मारोती चव्हाण, हणमंत पांचाळ, रुद्रा भोस्कर, दीपक वड, काळेश्वर पांचाळ, दिनेश पवार, ज्ञानेश्वर वड यांच्यासह बहुसंख्य गावकरी व भाविक उपस्थित होते.
‘ज्ञानोबा माऊली तुकाराम’च्या नामघोषाने आणि भक्तिमय वातावरणात सुरू झालेल्या या दिंडी सोहळ्यामुळे जुना लोहा परिसरात आध्यात्मिक वातावरण निर्माण झाले आहे.
