बुलडाणा | प्रतिनिधी
बुलडाणा जिल्ह्यातील उमरा लासुरा येथील जिल्हा परिषद मराठी शाळेत गेल्या सुमारे २० वर्षांपासून वीजपुरवठ्याची सुविधा नसल्याचा गंभीर आरोप समोर आला आहे. त्यामुळे विद्यार्थ्यांना आजही अंधारात शिक्षण घ्यावे लागत असल्याची स्थिती आहे.
स्थानिकांच्या माहितीनुसार, सुमारे २० वर्षांपूर्वी शाळेसाठी वीज मीटर बसविण्यात आला होता. मात्र, कालांतराने तो मीटरही गायब झाल्याचे सांगण्यात येत आहे. त्यानंतर शाळेला नियमित वीजपुरवठा उपलब्ध झालेला नसल्याने विद्यार्थ्यांना अनेक अडचणींचा सामना करावा लागत आहे.
वीज सुविधेअभावी शाळेतील शैक्षणिक कामकाजावर परिणाम होत असून, विद्यार्थ्यांना मूलभूत सुविधांपासून वंचित राहावे लागत असल्याची नाराजी व्यक्त होत आहे. विशेष म्हणजे शाळेच्या परिसरात मोठ्या प्रमाणात गवत वाढले असून, अस्वच्छता आणि डासांचा प्रादुर्भावही वाढल्याचे सांगण्यात येत आहे. त्यामुळे विद्यार्थ्यांच्या आरोग्याबाबतही चिंता व्यक्त केली जात आहे.
शाळांसाठी केंद्र व जिल्हा परिषद स्तरावर विविध योजनांच्या माध्यमातून निधी उपलब्ध करून दिला जात असताना, उमरा लासुरा येथील शाळेपर्यंत मूलभूत सुविधा का पोहोचत नाहीत, असा सवाल स्थानिक नागरिकांकडून उपस्थित केला जात आहे. ग्रामपंचायत तसेच संबंधित प्रशासनाने या शाळेकडे तातडीने लक्ष देण्याची मागणी होत आहे.
ही केवळ उमरा लासुरा येथील शाळेची समस्या नसून, ग्रामीण भागातील अनेक जिल्हा परिषद शाळांमध्ये मूलभूत सुविधांचा अभाव असल्याची बाब पुन्हा एकदा अधोरेखित झाली आहे.
विद्यार्थ्यांना सुरक्षित आणि सुविधायुक्त वातावरणात शिक्षण मिळणे हा त्यांचा मूलभूत हक्क आहे. त्यामुळे उमरा लासुरा जिल्हा परिषद शाळेत तातडीने वीजपुरवठा सुरू करावा, परिसराची स्वच्छता करावी आणि विद्यार्थ्यांच्या सुरक्षिततेसाठी आवश्यक उपाययोजना कराव्यात, अशी मागणी नागरिकांकडून करण्यात येत आहे.
“शिक्षणाचा हक्क कागदावर नव्हे, तर प्रत्यक्ष सुविधांसह मिळायला हवा,” अशी भावना पालक व नागरिकांनी व्यक्त केली आहे.
