पुणे येथील धनगर समाज सेवा संघाचे पदाधिकारी आणि मुंबईतील समाजबांधवांचा संयुक्त सहभाग; ३ जानेवारी २०२७ रोजी पुण्यात राज्यस्तरीय मेळावा
प्रतिनिधी : भारत कवितके : कांदिवली पश्चिम येथे धनगर समाज सेवा संघ आणि धनगर समाजबांधवांची वधू-वर मेळाव्याच्या नियोजनासंदर्भात चर्चा बैठक उत्साहात संपन्न झाली. रविवार, २२ नोव्हेंबर २०२६ रोजी दुपारी ३ वाजता इराणीवाडी रोड क्रमांक ३ येथील श्री सिद्धिविनायक सहकारी गृहनिर्माण संस्थेच्या कार्यालयात ही संयुक्त बैठक आयोजित करण्यात आली होती. यामध्ये पुणे येथील धनगर समाज सेवा संघाचे पदाधिकारी व कार्यकर्ते तसेच कांदिवली परिसरातील समाजबांधव सहभागी झाले होते.
बैठकीच्या सुरुवातीला दोन्ही बाजूंच्या समाजबांधवांनी एकमेकांशी परिचय करून दिला. धनगर समाजातील ज्येष्ठ पत्रकार, साहित्यिक, गीतकार व सामाजिक कार्यकर्ते भारत कवितके यांनी धनगर समाज सेवा संघाच्या पदाधिकारी आणि कार्यकर्त्यांचे स्वागत करून त्यांचा सत्कार केला. तसेच हिंगोली येथील धनगर समाजाचे नेते रामरावजी वडतिके यांच्या निधनाबद्दल बैठकीत श्रद्धांजली अर्पण करण्यात आली.
यावेळी धनगर समाज सेवा संघाचे अध्यक्ष मुकुंदराव कुचेकर यांनी प्रास्ताविकात संघाच्या कार्याची माहिती दिली. सध्या संघाचे कार्य २५ जिल्ह्यांमध्ये सुरू असून समाजबांधवांना अधिक चांगल्या प्रकारे सेवा देण्याचा संघाचा प्रयत्न असल्याचे त्यांनी सांगितले. संघाच्या वतीने सुबक व आकर्षक रंगीत नोंदणी पुस्तिका तयार केली जात असल्याची माहितीही त्यांनी दिली.
पुणे येथील राहटणी येथे ३ जानेवारी २०२७ रोजी आयोजित करण्यात येणाऱ्या १९ व्या राज्यस्तरीय वधू-वर मेळाव्याला सर्व समाजबांधवांनी सहकार्य करावे, असे आवाहन मुकुंदराव कुचेकर यांनी केले. यावेळी संघाच्या विस्ताराचा आणि कार्याचा आढावाही घेण्यात आला.
या बैठकीस मुकुंदराव कुचेकर, भारत कवितके, शिवाजी पिसे, केशव कुचेकर, मल्हारी लाळगे, किरण कुचेकर, दिलीप कुचेकर, बाळासाहेब पिसे, अभिमन्यू गाडेकर, रमेश सावळकर, भीमराव सातपुते, गजानन कवितके, तुकाराम देवडे, धानापुणे, सतीश पिसे यांच्यासह धनगर समाजबांधव उपस्थित होते.











