जामखेड | अमृत कारंडे.
जामखेड तालुक्यातील साकत गावचे सुपुत्र आणि ज्येष्ठ पत्रकार बापुसाहेब घोडेस्वार यांना त्यांच्या निर्भीड पत्रकारितेबद्दल राज्यस्तरीय ‘महाराष्ट्र गुणगौरव पुरस्काराने’ सन्मानित करण्यात आले आहे. शिर्डी येथे आयोजित एका दिमाखदार सोहळ्यात त्यांना हा पुरस्कार प्रदान करण्यात आला. विशेष म्हणजे, बापुसाहेब घोडेस्वार यांना या वर्षात मिळालेला हा दुसरा राज्यस्तरीय पुरस्कार असल्याने त्यांच्यावर सर्वच स्तरातून अभिनंदनाचा वर्षाव होत आहे.
मान्यवरांची प्रमुख उपस्थिती
या सोहळ्याला प्रमुख पाहुणे म्हणून भारतीय सैन्य दलाचे निवृत्त सुबेदार मेजर मा. सुनील उत्तमराव मोहोड, प्रसिद्ध अभिनेत्री व मॉडेल मा. निवेदिता पगार, निवृत्त अधिकारी अरुण भंडारे, मा. निलेशजी घोडेचोर, मा. शुभांगी थोरात, डॉ. निलेश गायकवाड आणि अँड. योगेश दवंगे उपस्थित होते. उपस्थित मान्यवरांच्या हस्ते बापुसाहेब घोडेस्वार यांच्या पत्रकारिता क्षेत्रातील उल्लेखनीय कार्याचा गौरव करण्यात आला.
निर्भीड पत्रकारितेची दखल
बापुसाहेब घोडेस्वार यांनी नेहमीच सर्वसामान्यांचे प्रश्न मांडत निर्भीड आणि निष्पक्ष पत्रकारिता केली आहे. समाजहितासाठी त्यांनी पत्रकारितेच्या माध्यमातून दिलेल्या योगदानाची दखल घेऊनच त्यांची या राज्यस्तरीय पुरस्कारासाठी निवड करण्यात आली.
या सोहळ्या प्रसंगी प्रकाश रेणुसे (मॅनेजर, एस. के. प्रायव्हेट लिमिटेड कंपनी, पुणे), रंजीत जाधव, अरुण डाडर, महादेव पुलवळे, भाऊसाहेब घोडेस्वार, अमोल राजे पुलवळे यांच्यासह विविध क्षेत्रातील मान्यवर, स्नेही आणि नागरिक मोठ्या संख्येने उपस्थित होते. बापुसाहेब घोडेस्वार यांच्या या यशाबद्दल जामखेड आणि साकत परिसरामध्ये आनंदाचे वातावरण असून राजकीय, सामाजिक आणि पत्रकारिता क्षेत्रातून त्यांच्यावर कौतुकाचा वर्षाव होत आहे.
