पंडित पाटील सुगावे यांच्या निवासस्थानी खासदारांची सदिच्छा भेट; कोरडा दुष्काळ जाहीर करून सरसकट मदत व पीक विम्याची मागणी
लोकन्याय न्यूज नेटवर्क
नायगाव विशेष प्रतिनिधी : दिपक गजभारे
घुंगराळा : दरवर्षीप्रमाणे याही वर्षी बळेगाव ते गंगनबीड कावड यात्रा घुंगराळा मार्गे जात असताना, यात्रेच्या निमित्ताने नांदेड जिल्ह्याचे लोकप्रिय खासदार प्रा. रवींद्र वसंतराव पाटील चव्हाण यांनी घुंगराळा येथील काँग्रेसचे एकनिष्ठ कार्यकर्ते श्री. पंडित पाटील सुगावे यांच्या निवासस्थानी सदिच्छा भेट दिली.
यावेळी युवा उद्योजक अमित भैया बोंडले यांनी खासदारांची भेट घेऊन मतदारसंघातील शेतकऱ्यांच्या गंभीर परिस्थितीचा प्रश्न मांडला. यंदा पावसाचे प्रमाण कमी झाल्याने अनेक भागांतील पिके करपली असून शेतकरी आर्थिक संकटात सापडल्याचे त्यांनी खासदारांच्या निदर्शनास आणून दिले.
शेतकऱ्यांना तातडीने दिलासा मिळण्यासाठी कोरडा दुष्काळ जाहीर करावा, सरसकट आर्थिक मदत द्यावी तसेच पीक विम्याचा लाभ मिळवून द्यावा, अशी मागणी अमित भैया बोंडले यांनी केली. तसेच पात्र शेतकऱ्यांना शासनाच्या विविध योजनांचा लाभ मिळवून देण्यासाठी प्रशासनाकडे पाठपुरावा करण्याची विनंतीही केली.
यावर खासदार प्रा. रवींद्र वसंतराव पाटील चव्हाण यांनी शेतकऱ्यांच्या प्रश्नाबाबत सकारात्मक प्रतिसाद देत, हा विषय संबंधित प्रशासनाच्या निदर्शनास आणून देऊन शेतकऱ्यांना न्याय मिळवून देण्यासाठी प्रयत्न करण्याचे आश्वासन दिल्याचे सांगण्यात आले.
ग्रामस्थ व मान्यवरांची उपस्थिती
यावेळी व्यंकटराव पा. सुगावे, बाबुराव पा. सुगावे, प्रल्हाद पा. ढगे, युवा उद्योजक अमित भाऊ बोंडले, माजी सरपंच प्रतिनिधी मोहन जोगेवार, बालाजी तुरटवाड, शंकर पा. सुगावे, व्यंकटराव ढगे, शेख चांद पाशा, माधव कंचलवाड, बालाजी पा. शिंदे, देविदास पा. सुगावे, अशोक पा. सुगावे, आनंद पा. सुगावे, दिगंबर गंगासागरे, तुकाराम कळकटवाड, पांडुरंग सूर्यवंशी, बालाजी सूर्यवंशी, योगेश पा. सुगावे, लक्ष्मण कासराळे, बाजीराव ढगे यांच्यासह गावातील युवा वर्ग, शेतकरी व प्रतिष्ठित नागरिक मोठ्या संख्येने उपस्थित होते.
कावड यात्रेच्या निमित्ताने झालेल्या या भेटीत शेतकऱ्यांच्या प्रश्नांना प्राधान्य देत त्यांच्या अडचणी शासनदरबारी मांडण्याची मागणी करण्यात आली. त्यामुळे उपस्थित शेतकरी व ग्रामस्थांमध्ये समाधान व्यक्त करण्यात आले.
