ढोल-ताशांचा गजर व लेझिमच्या तालावर गणरायाला निरोप; तडवी समाजाच्या वतीने गणेश मंडळांच्या पदाधिकाऱ्यांचा सत्कार
मुंजलवाडी प्रतिनिधी :
मुंजलवाडी, ता. रावेर येथे गणेश विसर्जनानिमित्त भव्य मिरवणूक उत्साहात व भक्तिमय वातावरणात काढण्यात आली. जय बजरंग लेझिम मंडळ आणि शिव मल्हार गणेश मंडळाने ढोल-ताशांच्या गजरात तसेच लेझिमच्या तालावर मिरवणुकीत उत्स्फूर्त सहभाग नोंदविला.
मिरवणुकीदरम्यान तरुणाईच्या उत्साहाने संपूर्ण गाव दुमदुमून गेले. पारंपरिक घोषणांनी परिसर भक्तिमय झाला. गावातील प्रमुख मार्गांवरून मिरवणूक काढण्यात आली.
यावेळी तडवी समाज बांधवांच्या वतीने सर्व गणेश मंडळांच्या अध्यक्ष व उपाध्यक्षांचा नारळ व हार देऊन सत्कार करण्यात आला. या उपक्रमातून सामाजिक सलोखा आणि एकतेचा संदेश देण्यात आला.
नऊ दिवसांच्या मुक्कामानंतर लाडक्या गणरायाला निरोप देताना भाविकांमध्ये भावनिक वातावरण निर्माण झाले होते. भक्तिभावाने गणरायाची पूजा करून ‘गणपती बाप्पा मोरया, पुढच्या वर्षी लवकर या’च्या जयघोषात गणेशभक्तांनी बाप्पाला निरोप दिला.
गणेश विसर्जन मिरवणूक शांततेत व उत्साहात पार पडण्यासाठी पोलीस प्रशासन, मुंजलवाडी गावचे पोलीस पाटील तसेच ग्रामस्थांचे सहकार्य लाभले.
