जऊळका परिसरातील पाहणीत शेतकऱ्यांशी संवाद; उत्तमसिंग नायक यांनी मांडल्या शेतकऱ्यांच्या व्यथा
मालेगाव, जि. वाशिम / प्रतिनिधी :
पावसातील खंडामुळे निर्माण झालेल्या दुष्काळसदृश परिस्थितीच्या पार्श्वभूमीवर मुख्यमंत्री देवेंद्र फडणवीस यांनी २४ सप्टेंबर रोजी वाशिम जिल्ह्यातील विविध भागांचा दौरा करून नुकसानग्रस्त पिकांची प्रत्यक्ष पाहणी केली. या दौऱ्यात मालेगाव तालुक्यातील जऊळका परिसरातील शेतकऱ्यांच्या बांधावर जाऊन त्यांनी पीक व पाणी परिस्थितीचा आढावा घेतला. यावेळी शेतकऱ्यांशी संवाद साधून त्यांच्या अडचणी जाणून घेतल्या.
यावेळी काळमाथा संस्थांचे उपाध्यक्ष उत्तमसिंग नायक यांनी मुख्यमंत्री फडणवीस यांच्यासमोर शेतकऱ्यांच्या अडचणी आणि पिकांच्या नुकसानीची माहिती मांडली. पावसाच्या अनिश्चिततेमुळे शेतकरी आर्थिक अडचणीत सापडल्याचे त्यांनी सांगत नुकसानग्रस्त शेतकऱ्यांना तातडीने मदत मिळावी, अशी भूमिका मांडली.
मुख्यमंत्री फडणवीस यांनी शेतकऱ्यांशी थेट संवाद साधत त्यांच्या समस्या ऐकून घेतल्या. शासन नुकसानग्रस्त शेतकऱ्यांच्या पाठीशी असल्याचे त्यांनी सांगितले. वाशिम जिल्ह्यातील म्हसला, मोहगव्हाण आणि जऊळका येथे मुख्यमंत्र्यांनी पीक-पाणी परिस्थितीची पाहणी केल्याची माहिती अधिकृत विभागीय माहिती कार्यालयाने दिली आहे.
दरम्यान, नुकसानग्रस्त भागातील परिस्थितीचा आढावा घेतल्यानंतर मदतीसंदर्भातील निर्णय प्रक्रिया सुरू असल्याचे मुख्यमंत्री फडणवीस यांनी सांगितले. शेतकऱ्यांना दिलासा देण्यासाठी शासनस्तरावर उपाययोजना करण्याचे संकेतही त्यांनी दिले आहेत.
मुख्यमंत्र्यांच्या प्रत्यक्ष पाहणीमुळे नुकसानग्रस्त शेतकऱ्यांच्या समस्या शासनाच्या निदर्शनास आल्याची भावना व्यक्त होत असून, आता प्रत्यक्ष मदतीकडे शेतकऱ्यांचे लक्ष लागले आहे.
