लोकनेते स्व. आमदार सुभाषआण्णा कुल कृषी भूषण पुरस्कार २०२५-२६ अंतर्गत गौरव; आमदार राहुलदादा कुल यांच्या हस्ते सन्मान
मळद : प्रतिनिधी : लोकनेते स्व. आमदार सुभाषआण्णा कुल कृषी भूषण पुरस्कार २०२५-२६ अंतर्गत दौंड कार्यक्षेत्रातील उत्कृष्ट कांदा उत्पादन व वखार साठवणूक करणारे शेतकरी म्हणून श्री. दादासो कृष्णा भागवत यांचा गौरव करण्यात आला. दौंडचे आमदार राहुलदादा कुल यांच्या हस्ते त्यांना हा पुरस्कार प्रदान करण्यात आला.
दादासो कृष्णा भागवत यांना सुरुवातीपासूनच शेतीची विशेष आवड असून, आधुनिक तंत्रज्ञान, मेहनत आणि योग्य नियोजनाच्या माध्यमातून त्यांनी शेती क्षेत्रात उल्लेखनीय कामगिरी केली आहे. विशेषतः कांदा उत्पादन आणि कांदा वखार साठवणुकीच्या क्षेत्रात त्यांनी उल्लेखनीय कार्य केले आहे.
पंचक्रोशीत नावाजलेले कांदा बागायतदार म्हणून त्यांची ओळख असून, कांद्यासोबतच ऊस पिकामध्येही उत्पादन घेणारे प्रगतिशील शेतकरी म्हणून त्यांचा लौकिक आहे. शेतीकडे केवळ व्यवसाय म्हणून न पाहता कष्ट, सातत्य आणि आधुनिक तंत्रज्ञानाच्या माध्यमातून शेतीला अधिक सक्षम व उत्पादनक्षम बनविण्याचा त्यांचा प्रयत्न राहिला आहे.
त्यांच्या या कृषी क्षेत्रातील उल्लेखनीय कार्याची दखल घेत त्यांना कृषी भूषण पुरस्काराने सन्मानित करण्यात आले. या पुरस्कारामुळे त्यांच्या कृषी कार्याचा गौरव झाला असून, परिसरातील शेतकऱ्यांसाठी त्यांची शेतीपद्धती प्रेरणादायी ठरत आहे.
दादासो कृष्णा भागवत यांच्या या यशाबद्दल पंचक्रोशीतील शेतकरी, ग्रामस्थ, मित्रपरिवार तसेच कृषी क्षेत्रातील मान्यवरांकडून त्यांचे अभिनंदन करण्यात येत आहे.
