SIR प्रक्रियेवरून निवडणूक आयोगातील कथित मतभेदांचा मुद्दा; उपविभागीय अधिकाऱ्यांना निवेदन
ब्रह्मपुरी | ता. प्रतिनिधी | दि. २९ सप्टेंबर
निवडणूक आयोगाच्या कार्यपद्धतीबाबत उपस्थित झालेल्या प्रश्नांच्या पार्श्वभूमीवर मुख्य निवडणूक आयुक्त ज्ञानेश कुमार यांच्या राजीनाम्याची मागणी करत ब्रह्मपुरी येथे काँग्रेसच्या वतीने आंदोलन करण्यात आले. ब्रह्मपुरी उपविभागीय अधिकारी कार्यालयासमोर झालेल्या या आंदोलनानंतर उपविभागीय अधिकाऱ्यांना निवेदन सादर करण्यात आले.
निवडणूक आयोगातील दोन निवडणूक आयुक्तांनी विशेष सखोल पुनरिक्षण (SIR) तसेच अन्य निर्णयांबाबत १० महिन्यांच्या कालावधीत किमान १४ वेळा लेखी आक्षेप नोंदवल्याचा वृत्तांत प्रसिद्ध झाला आहे. या वृत्ताच्या पार्श्वभूमीवर काँग्रेसने निवडणूक आयोगाच्या कार्यपद्धतीवर प्रश्न उपस्थित करत मुख्य निवडणूक आयुक्तांच्या राजीनाम्याची मागणी केली आहे.
काँग्रेसच्या आंदोलकांनी या प्रकरणात मुख्य निवडणूक आयुक्तांवर कायदेशीर कारवाई करण्याची मागणीही निवेदनातून केली. निवडणूक प्रक्रियेतील पारदर्शकता आणि विश्वासार्हतेबाबत निर्माण झालेल्या प्रश्नांवर शासनाने भूमिका स्पष्ट करावी, अशी मागणी यावेळी करण्यात आली.
दरम्यान, निवडणूक आयोगाने प्रसिद्ध झालेल्या आरोपांबाबत स्पष्टीकरण देताना SIRसह आयोगाचे सर्व महत्त्वाचे निर्णय तिन्ही निवडणूक आयुक्तांच्या मान्यतेने आणि एकमताने घेण्यात आल्याचे म्हटले आहे. त्यामुळे या मुद्द्यावर काँग्रेसच्या आरोपांसोबत आयोगाची भूमिका देखील चर्चेत आहे.
काँग्रेस पदाधिकारी व कार्यकर्ते उपस्थित
यावेळी महाराष्ट्र प्रदेश काँग्रेस कमिटीचे सचिव डॉ. थानेश्वर कायरकर, तालुका काँग्रेस कमिटीचे अध्यक्ष खेमराज तिडके, नगराध्यक्ष योगेश मिसार, शहराध्यक्ष हितेंद्र राऊत, युवक काँग्रेसचे अध्यक्ष सोनू नाकतोडे, माजी जिल्हा सदस्य प्रमोद चिमूरकर, माजी जिल्हा परिषद सदस्य प्रा. राजेश कांबळे, वासुदेव सौंदरकर, नगरसेवक प्रकाश खोब्रागडे, बंटीभाऊ श्रीवास्तव, नेताजी मेश्राम, वामन मिसार, नगरसेवक राकेश पडोळे, विनोद बुल्ले, कपिल राऊत, तालुका महिला काँग्रेस अध्यक्षा मंगला लोनबले, माजी जिल्हा परिषद सदस्या भावना इरपाते, नगरसेविका रंजना बुराडे, बबीता आमले, लताताई ठाकूर, सुनीताताई तिडके, रश्मी पगाडे, जया कन्नाके, सुशीला सोंडवले, अरुण अलोने, जगदीश आमले, कल्पना तुपट, राममोहन ब्राडिया, इरफान पठाण, गीता मुंगले, किशोर राऊत, रुपेश बानबले, मोहसिन कुरेशी, केशव करंबे, मुकुंदा राऊत, संजय राऊत, ज्ञानेश्वर झरकर यांच्यासह काँग्रेसचे पदाधिकारी व कार्यकर्ते उपस्थित होते.
