बुद्ध, धम्म आणि संघाच्या विचारांचा प्रसार; प्रज्ञा, करुणा, मैत्री व समतेचा संदेश
दिघोडे | प्रतिनिधी
अखिल उरण तालुका बौद्धजन पंचायत समिती शाखा क्र. १, पंचशील मंडळ आणि रमाई महिला मंडळ, दिघोडे यांच्या संयुक्त विद्यमाने डॉ. बाबासाहेब आंबेडकर नगर, दिघोडे, ता. उरण येथे रविवार, दि. २७ सप्टेंबर २०२६ रोजी वर्षावास कार्यक्रमाचे आयोजन करण्यात आले. सकाळी ११ वाजता झालेल्या या कार्यक्रमाला परिसरातील बौद्ध उपासक-उपासिका, महिला, युवक, ज्येष्ठ नागरिक तसेच धम्मप्रेमी मोठ्या संख्येने उपस्थित होते.
कार्यक्रमाची सुरुवात बौद्ध पूजापाठाने झाली. बौद्धाचार्य धम्मरत्न आयु. हिरामण जोशी गुरुजी आणि बौद्धाचार्य आयु. प्रमोद कांबळे यांनी भगवान गौतम बुद्ध व डॉ. बाबासाहेब आंबेडकर यांच्या प्रतिमेचा पूजापाठ केला.
कार्यक्रमाचे अध्यक्षस्थान अखिल उरण तालुका बौद्धजन पंचायत समिती ग्रामीण शाखा क्र. १ चे अध्यक्ष आयु. सुदर्शन जाधव यांनी भूषविले. यावेळी पंचशील मंडळाचे अध्यक्ष आयु. कृष्णा जोशी, काशिनाथ जोशी, बौद्धजन पंचायत समितीचे उपाध्यक्ष संजय गायकवाड, ज्येष्ठ सभासद रमेश गायकवाड, सदानंद गायकवाड, सुरेश गायकवाड, अनिल गायकवाड, दीपक गायकवाड, सरचिटणीस सुनील जोशी, नवनीत कांबळे, धम्मप्रचारक विजया जोशी, संकेता जोशी, दिघोडे ग्रामपंचायतीचे माजी सरपंच, बौद्धजन पंचायत समितीचे खजिनदार अशोक कांबळे गुरुजी, चिरनेरचे कार्यकारी सभासद प्रमोद गाडे यांच्यासह विविध पदाधिकारी व मान्यवर उपस्थित होते.
‘वर्षावासाचे महत्त्व’ विषयावर मार्गदर्शन
पनवेल तालुका अध्यक्ष (भारतीय बौद्ध महासभा) तथा उद्योजक ॲड. सुनील वाघपंजे यांनी प्रमुख प्रवचनकार म्हणून मार्गदर्शन केले. ‘बौद्ध धम्मामध्ये वर्षावासाचे महत्त्व’ या विषयावर बोलताना त्यांनी भगवान बुद्धांच्या काळापासून चालत आलेली वर्षावासाची परंपरा, त्यामागील धम्मविचार तसेच वर्षावासाच्या काळातील धम्म-अभ्यास, चिंतन, आत्मपरीक्षण आणि समाजप्रबोधनाचे महत्त्व स्पष्ट केले.
वर्षावासाच्या माध्यमातून बुद्ध, धम्म आणि संघाच्या विचारांचा समाजात प्रसार करून प्रज्ञा, करुणा, मैत्री आणि समतेची मूल्ये रुजविण्याचा संदेश यावेळी देण्यात आला.
कार्यक्रमाचे सूत्रसंचालन आयु. प्रफुल्ल मनोहर जोशी आणि आयु. संदीप गजानन जोशी यांनी केले. विंधणे, चिरनेर, कळंबूसरे, पिरकोन, दिघोडे तसेच उरण परिसरातील महिला, युवक, ज्येष्ठ नागरिक, बालक-बालिका, बौद्ध उपासक-उपासिका आणि धम्मप्रेमी मोठ्या संख्येने उपस्थित होते.
कार्यक्रमानंतर गोडधोड भोजन समारंभ पार पडला. उत्साहपूर्ण आणि धम्ममय वातावरणात कार्यक्रमाची सांगता झाली. कार्यक्रमाच्या यशस्वी आयोजनासाठी स्थानिक पंचशील मंडळ, महिला मंडळ आणि युवा कार्यकर्त्यांनी विशेष परिश्रम घेतले.
