राहुल छत्तीसे यांचा चौकशी व कारवाईची मागणी
श्रीगोंदा : प्रतिनिधी : श्रीगोंदा तालुक्यातील जोशीवस्ती ग्रामपंचायतीच्या आठवडे बाजारातील व्यापाऱ्यांकडून ठरवून दिलेल्या दरापेक्षा जादा बाजारकर वसूल केला जात असल्याचा आरोप राहुल संजय छत्तीसे यांनी केला आहे. याप्रकरणी त्यांनी ग्रामपंचायत अधिकारी, प्रशासक तसेच गटविकास अधिकारी यांच्याकडे तक्रारी व अर्ज साद करून सखोल चौकशीची मागणी केली आहे.
राहुल छत्तीसे यांनी २९ जुलै, १८ ऑगस्ट आणि ३ सप्टेंबर २०२६ रोजी संबंधित अधिकाऱ्यांकडे अर्ज दिल्याचे सांगितले. तक्रारीनंतर ग्रामपंचायतीने बाजारकर लिलावधारकाला ३१ जुलै रोजी नोटीस बजावली. त्यानंतर २१ ऑगस्ट रोजी दुसरी तसेच अंतिम नोटीस देण्यात आल्याचे त्यांनी नमूद केले.
ग्रामपंचायतीच्या नोटिशीनुसार, लिलावाच्या अटी व शर्तीनुसार १०० रुपयांच्या स्टॅम्प पेपरवर करारनामा करून दिलेला नसल्याची तसेच ठरवून दिलेल्या दराप्रमाणे बाजारकराची वसुली न करता जादा दराने वसुली होत असल्याच्या तक्रारी ग्रामपंचायतीकडे प्राप्त झाल्या आहेत. याबाबत संबंधित लिलावधारकाला यापूर्वी लेखी व तोंडी सूचना देण्यात आल्याचेही नोटिशीत नमूद करण्यात आले आहे.
तक्रारी सुरूच राहिल्याने यापुढे बाजारकराची वसुली अटी व शर्तीनुसारच करावी आणि केलेल्या कार्यवाहीचा अहवाल ग्रामपंचायतीकडे सादर करावा, असे निर्देश देण्यात आले आहेत. अन्यथा बाजारकराचा लिलाव रद्द करण्याची कारवाई करण्यात येईल, असा इशाराही ग्रामपंचायतीने दिल्याचे सांगण्यात आले.
दरम्यान, ग्रामपंचायत कर्मचाऱ्यांकडून या प्रकरणाची चौकशी करण्यात आली असून काही त्रुटी आढळून आल्याची माहिती पुराव्यांसह वरिष्ठ अधिकाऱ्यांना देण्यात आल्याचा दावा राहुल छत्तीसे यांनी केला आहे. लिलावधारकाने ग्रामपंचायतीच्या अटी-शर्ती व नियमांचे उल्लंघन केले असल्याचा आरोप करत त्यांनी संपूर्ण प्रकरणाची निष्पक्ष चौकशी करून दोषींवर योग्य ती कारवाई करण्याची मागणी केली आहे.
तसेच काही व्यक्तींकडून संबंधित लिलावधारकाला पाठीशी घातले जात असल्याचा आरोपही छत्तीसे यांनी केला आहे. बाजारातील व्यापाऱ्यांवर दबाव आणला जात आहे का, याचीही प्रशासनाने चौकशी करावी, अशी मागणी त्यांनी केली.
या प्रकरणासंदर्भात प्रसिद्ध झालेल्या बातम्या व प्रेसनोटची सत्यताही तपासण्यात यावी, अशी मागणी करण्यात आली आहे. त्यामुळे जोशीवस्ती आठवडे बाजारातील बाजारकर वसुलीचा प्रश्न चर्चेत आला असून, ग्रामपंचायत व प्रशासनाच्या पुढील कारवाईकडे नागरिकांचे लक्ष लागले आहे.
