‘आवडेल तेथे कोठेही प्रवास पास’ योजनेत महत्त्वपूर्ण बदल; कागदी किंवा मोबाईलवरील PDF पासही वैध
बीड : प्रतिनिधी
महाराष्ट्र राज्य मार्ग परिवहन महामंडळाच्या (एसटी) ‘आवडेल तेथे कोठेही प्रवास पास’ योजनेत महत्त्वपूर्ण बदल करण्यात आला आहे. आतापर्यंत आगारांमध्ये हस्तलिखित स्वरूपात उपलब्ध होणारे ४ दिवस व ७ दिवसांचे प्रवास पास आता प्रवाशांना घरबसल्या ऑनलाइन प्रणालीद्वारे मिळणार आहेत, अशी माहिती बीड विभागाचे विभाग नियंत्रक यांनी दिली.
प्रवाशांचा वेळ वाचावा तसेच पास काढण्याची प्रक्रिया अधिक सुलभ आणि पारदर्शक व्हावी, यासाठी महामंडळाने ही डिजिटल सुविधा सुरू केली आहे. इच्छुक प्रवाशांनी महामंडळाच्या अधिकृत संकेतस्थळावर आवश्यक वैयक्तिक व प्रवासाची माहिती भरून विहित शुल्काचा ऑनलाइन भरणा केल्यानंतर प्रवास पास मिळवता येणार आहे.
कागदी किंवा PDF पास वैध
ऑनलाइन काढलेला प्रवास पास कागदी प्रिंट स्वरूपात किंवा मोबाईलमध्ये PDF स्वरूपात ठेवता येणार असून, दोन्ही प्रकार प्रवासासाठी वैध राहणार आहेत. प्रवासादरम्यान वाहक ईटीआय (ETI) मशीनद्वारे पासवरील QR कोड स्कॅन करून प्रवाशाचे नाव, पासचा प्रकार आणि वैधता कालावधी आदी माहिती तपासणार आहेत.
प्रवाशांनी प्रवासादरम्यान मूळ किंवा डिजीलॉकरमधील वैध ओळखपत्र, जसे आधारकार्ड, पॅनकार्ड आदी, पडताळणीसाठी वाहकास दाखवणे आवश्यक आहे.
QR कोड स्कॅन न झाल्यास हेल्पलाइन
तांत्रिक कारणामुळे QR कोड स्कॅन न झाल्यास पडताळणीसाठी ०८०६५९०३२७२ आणि ०८०६५९०३२७३ हे क्रमांक उपलब्ध करून देण्यात आले आहेत.
एसटी महामंडळाच्या या डिजिटल सुविधेचा बीड जिल्ह्यातील प्रवाशांनी मोठ्या प्रमाणावर लाभ घ्यावा, असे आवाहन बीड विभागाच्या वतीने करण्यात आले आहे.
