पावसाळ्यात गुडघाभर चिखल; विद्यार्थ्यांसह दूध उत्पादक शेतकऱ्यांचे हाल
राहुरी : प्रतिनिधी
राहुरी तालुक्यातील वांजुळपोई गावातील अमळनेर बंधारा रस्त्याची गेल्या दहा वर्षांपासून मोठ्या प्रमाणात दुरवस्था झाली असून, प्रशासनाच्या दुर्लक्षामुळे नागरिकांना मोठ्या अडचणींचा सामना करावा लागत आहे. रस्त्याच्या दुरुस्तीबाबत वेळोवेळी निवेदने देऊनही अद्याप ठोस कार्यवाही झालेली नसल्याने ग्रामस्थांमध्ये नाराजी व्यक्त होत आहे.
पावसाळ्यात या रस्त्यावर मोठ्या प्रमाणात चिखल साचतो. अनेक ठिकाणी गुडघ्यापर्यंत चिखल होत असल्याने विद्यार्थ्यांना शाळेत जाणेही कठीण होते. पावसाच्या दिवसांत रस्त्याची अवस्था इतकी बिकट होते की विद्यार्थ्यांना शाळेत जाणे शक्य होत नसल्याने त्यांचे शैक्षणिक नुकसान होत आहे.
या रस्त्याचा वापर दूध उत्पादक शेतकरीही मोठ्या प्रमाणात करतात. रस्त्यावर चिखल आणि खड्डे झाल्यामुळे वाहनातून दूध डेअरीपर्यंत नेणे शक्य होत नसल्याने काही शेतकऱ्यांना डोक्यावर दूधाचे कॅन घेऊन पायी जावे लागत आहे.
गेल्या अनेक वर्षांपासून रस्त्याच्या दुरुस्तीची मागणी करूनही प्रशासनाकडून दुर्लक्ष होत असल्याचा आरोप ग्रामस्थांनी केला आहे. विद्यार्थ्यांची गैरसोय तसेच शेतकऱ्यांच्या दैनंदिन अडचणी लक्षात घेऊन संबंधित प्रशासनाने या रस्त्याची तातडीने पाहणी करून कायमस्वरूपी दुरुस्ती करावी, अशी मागणी ग्रामस्थांकडून होत आहे.
