दुष्काळ, पाणीटंचाई, शाळा दुरुस्ती व विविध शासकीय योजनांवर सविस्तर चर्चा
काठी प्रतिनिधी : ग्रुप ग्रामपंचायत भांग्रापाणी येथे १ ऑक्टोबर २०२६ रोजी सकाळी १० वाजता ग्रामसभेचे आयोजन करण्यात आले. राष्ट्रपिता महात्मा गांधी यांच्या जयंतीनिमित्त त्यांच्या प्रतिमेचे पूजन करून ग्रामसभेला सुरुवात करण्यात आली.
ग्रामसभेत जन्म, मृत्यू, उपजत मृत्यू व विवाह नोंदींना मान्यता देणे, व्ही.बी.जी. रामजी योजना, ‘स्वच्छता ही सेवा’ अभियान, कृषी, शिक्षण, आरोग्य, विद्युत व पशुसंवर्धन विभागाशी संबंधित विषयांवर चर्चा करण्यात आली. तसेच वरिष्ठ कार्यालयाकडून प्राप्त परिपत्रकांचे वाचन, स्थलांतरित मजुरांचे प्रश्न आणि ऐनवेळी उपस्थित होणाऱ्या विषयांवरही चर्चा झाली.
नंदुरबार जिल्हा दुष्काळग्रस्त जाहीर झाल्याच्या पार्श्वभूमीवर अक्कलकुवा तालुक्यातील ग्रुप ग्रामपंचायत भांग्रापाणी अंतर्गत येणाऱ्या गावांमधील शेतकऱ्यांच्या शेतीची प्रत्यक्ष पाहणी करून दुष्काळग्रस्त शेतकऱ्यांना शासनाच्या नियमानुसार मदत मिळवून देण्यासाठी प्रयत्न करण्याबाबत चर्चा करण्यात आली. विविध गावांतील पाणीटंचाईचा प्रश्न तसेच जिल्हा परिषद शाळांच्या दुरुस्तीबाबतही ग्रामसभेत चर्चा झाली.
मतदार यादीतील नोंदणीसंदर्भातील एसआयआर प्रक्रियेबाबतही माहिती घेण्यात आली. ग्रामसभेत उपस्थित ज्येष्ठ नागरिक व युवकांकडून गावातील विविध समस्या जाणून घेऊन त्या सोडविण्यासाठी आवश्यक उपाययोजनांवर चर्चा करण्यात आली.
सरपंच सोन्या वसावे यांनी शासनाच्या विविध योजना प्रभावीपणे राबविण्यासाठी ग्रामपंचायतीच्या माध्यमातून प्रयत्न करण्यात येतील, असे सांगितले. तसेच जिल्हा परिषद शाळांमधील विद्यार्थ्यांची शैक्षणिक गुणवत्ता सुधारण्यासाठी ग्रामस्थांनीही लक्ष देणे आवश्यक असून शिक्षकांनीदेखील आपली जबाबदारी प्रभावीपणे पार पाडावी, असे त्यांनी नमूद केले.
यावेळी भांग्रापाणी, पिंप्रापाणी, वेरी चनवाई, जामली, उमटी व पिंपटी आदी गावांतील युवक, ज्येष्ठ नागरिक, आशा वर्कर, अंगणवाडी सेविका, सरपंच, उपसरपंच, प्राथमिक आरोग्य उपकेंद्र भांग्रापाणी येथील डॉ. जालमसिंग पाडवी, पत्रकार ईश्वर तडवी तसेच आरोग्य विभागातील कर्मचारी व ग्रामस्थ उपस्थित होते.
