शेतजमिनीच्या वारस नोंदीवरून वाद; कुटुंबीयांविरुद्ध पोलीस पाटलांकडे तक्रार
धडगाव प्रतिनिधी : सिसा येथील खासाडपाडा परिसरात शेतजमीन नावावर करण्याच्या गैरसमजातून मोतीलाल काटा ठाकरे आणि रीताबाई काटा ठाकरे यांना मारहाण झाल्याची तक्रार समोर आली आहे. ही घटना २९ सप्टेंबर २०२६ रोजी रात्री साडेनऊ ते साडेदहा वाजण्याच्या सुमारास घडल्याचे तक्रारीत नमूद करण्यात आले आहे.
तक्रारीनुसार, मोतीलाल व रीताबाई ठाकरे हे त्यांच्या घरी झोपले असताना दामा हांद्या ठाकरे, शेवंतीबाई दामा, अनिल दामा, गोमती अनिल, सुनील उर्फ कनिल दामा, रमिला सुनील उर्फ कनिल, प्रदीप दामा, संदीप दामा, अनिता संदीप, सुहास दामा व त्यांची पत्नी आदी घरी आल्याचे सांगण्यात आले आहे. शेतजमिनीच्या वारस नोंदीवरून त्यांनी वाद घालत शिवीगाळ व जीवे मारण्याची धमकी दिल्याचा आरोप तक्रारीत करण्यात आला आहे.
यावेळी मोतीलाल ठाकरे यांना मारहाण करण्यात आली. काही जणांनी हातपाय पकडले, तर काहींनी मारहाण केल्याचा आरोप आहे. मध्यस्थी करण्यासाठी रीताबाई पुढे आल्या असता त्यांच्या घराचा दरवाजा तोडून घरात प्रवेश केल्याचेही तक्रारीत नमूद आहे. त्यानंतर रीताबाई यांनाही पकडून मारहाण केल्याचा आरोप करण्यात आला आहे.
सातबारा उताऱ्यावरील नाव बदलण्याच्या अर्जावरून गैरसमज
रीताबाई ठाकरे यांच्या पतीचे चार वर्षांपूर्वी निधन झाले आहे. शासकीय योजनांचा लाभ घेण्यासाठी शेतकऱ्याचा फार्मर आयडी आवश्यक असल्याने मृत पतीच्या नावाऐवजी स्वतःचे नाव सातबारा उताऱ्यावर नोंदविण्यासाठी रीताबाई यांनी २९ सप्टेंबर रोजी धडगाव तहसील कार्यालयात अर्ज केल्याचे तक्रारीत म्हटले आहे.
या अर्जाचा गैरसमज करून रीताबाई स्वतःच्या नावावर जमीन करत असल्याचे समजून संबंधितांकडून मारहाण करण्यात आल्याचा आरोप करण्यात आला आहे. या घटनेत मोतीलाल व रीताबाई यांना दुखापत झाली असून मुका मार व नखांच्या ओरखड्यांच्या खुणा झाल्याचे तक्रारीत नमूद आहे.
या प्रकरणी सिसा येथील पोलीस पाटलांकडे दामा ठाकरे, त्यांचे कुटुंबीय तसेच संबंधितांविरुद्ध तक्रार करण्यात आली आहे. यापूर्वीही अशा प्रकारच्या घटना घडल्याचा दावा तक्रारीत करण्यात आला असून, भविष्यात कुटुंबातील कोणत्याही व्यक्तीस धोका निर्माण झाल्यास संबंधितांना जबाबदार धरावे, अशी मागणी करण्यात आली आहे.
दरम्यान, तक्रारीतील आरोपांची अधिकृत चौकशी झाल्यानंतरच घटनेमागील नेमकी वस्तुस्थिती स्पष्ट होणार आहे.
