गुरुजनांचे आगळेवेगळे स्वागत; शाळेला माजी विद्यार्थ्यांकडून आकर्षक नामफलकाची भेट
पेण प्रतिनिधी | दि. ३ ऑक्टोबर २०२६
क्रांतिकारक कै. गंगाधर मराठे विद्यामंदिर, नगरपरिषद पेण शाळा क्र. १ येथे माजी विद्यार्थी, माजी शिक्षक व माजी मावशी यांचे भव्य स्नेहसंमेलन उत्साहपूर्ण व भावनिक वातावरणात पार पडले. या कार्यक्रमाला माजी विद्यार्थी, शिक्षक, पालक व विद्यार्थ्यांची मोठी उपस्थिती होती.
या वेळी माजी विद्यार्थ्यांनी आपल्या गुरुजनांचे पाय धुऊन, पुसून फुलांच्या पायघडीवरून फुलांचा वर्षाव करत आगळ्या पद्धतीने स्वागत केले. गुरुजनांप्रती कृतज्ञता व्यक्त करण्याचा हा उपक्रम उपस्थितांसाठी विशेष आकर्षण ठरला.
माजी विद्यार्थ्यांच्या वतीने शाळेला नवीन आकर्षक नामफलक भेट देण्यात आला. या फलकाचे अनावरण माजी शिक्षकांच्या हस्ते करण्यात आले. तसेच आजी-माजी शिक्षक, मावशी व विद्यमान शिक्षकांचा शाल, श्रीफळ व भेटवस्तू देऊन सन्मान करण्यात आला. शाळेतील विद्यमान विद्यार्थ्यांनाही भेटवस्तू देण्यात आल्या.
सत्काराला उत्तर देताना माजी शिक्षक व मावशींनी भावनिक प्रतिक्रिया व्यक्त करत, आयुष्यात प्रथमच अशा प्रकारे कौतुक व सन्मान मिळाल्याचे सांगितले. शाळेची सध्याची परिस्थिती पाहून माजी विद्यार्थी व शिक्षकांनीही हळहळ व्यक्त केली. शाळेसाठी आवश्यक वस्तू व इतर मदत करण्यासाठी प्रयत्न करण्याचे आश्वासन त्यांनी दिले.
कार्यक्रमास माजी शिक्षक प्रिया शेटे, माऊस्कर, शिंगरुत, नयन जोशी, वृषाली जोशी, क्रांती धामणकर, फडतरे, आंधरे, बंगारे, विजया म्हात्रे तसेच माजी मावशी पिलाने, मेंडोसा व पाठारे उपस्थित होत्या. विद्यमान मुख्याध्यापिका रणपिसे मॅडम, आर्या पाटील, जोस्ना दळवी, जोस्ना गायकवाड मावशी तसेच शाळा व्यवस्थापन समितीच्या अध्यक्षा अनु मधू वाघमरे व उपाध्यक्षा आरती जाधव यांची उपस्थिती होती.
यावेळी सुमारे ५० माजी विद्यार्थी उपस्थित होते. कार्यक्रमानंतर अल्पोपहार व स्नेहभोजनाचे आयोजन करण्यात आले. सर्व माजी विद्यार्थ्यांनी एकत्रितपणे कार्यक्रमाचे यशस्वी आयोजन केले.
