अकोला : कॅप्टन स्मित मच्छर यांच्या आईचे माहेर अकोला शहरातील राजराजेश्वर नगरीत असल्याने अकोल्याशी त्यांचे जिव्हाळ्याचे नाते आहे. यावेळी त्यांनी आपल्या लहानपणीच्या अकोल्यातील आठवणींना उजाळा दिला. भारतीय जनता पक्षाच्या वतीने त्यांच्या जोगी परिवाराचे स्वागत करून कॅप्टन स्मित यांच्या प्रकृतीची विचारपूस करण्यात आली.
खासदार अनुप धोत्रे यांनी कॅप्टन स्मित यांचा अकोल्याशी असलेला संबंध अकोलेकरांसाठी अभिमानाची बाब असल्याचे सांगितले. इस्रायल तसेच पंतप्रधान नरेंद्र मोदी यांनी त्यांना स्वातंत्र्य दिनानिमित्त दिल्लीत आमंत्रित केल्याचा उल्लेख करत हा अकोल्यासाठी गौरवाचा क्षण असल्याचे त्यांनी नमूद केले.
आमदार रणधीर सावरकर यांनी कॅप्टन स्मित यांच्या कार्याचे कौतुक करताना मामा-मामी, आई-वडील आणि आजी-आजोबांच्या संस्कारांचा त्यांच्या व्यक्तिमत्त्वावर प्रभाव असल्याचे सांगितले. भाजप नेते विजय अग्रवाल यांनीही जोगी परिवाराचे स्वागत करून कॅप्टन स्मित यांनी देश-विदेशात अकोला आणि परिवाराचे नाव उज्ज्वल केल्याबद्दल आनंद व्यक्त केला.
यावेळी ‘भारत माता की जय’, ‘जय श्रीराम’, ‘वंदे मातरम’, ‘हर हर महादेव’, ‘राजराजेश्वर भगवान की जय’ आणि ‘संत गजानन महाराज की जय’ अशा घोषणांनी परिसर दुमदुमून गेला.
यावेळी कॅप्टन स्मित मच्छर यांच्यासह त्यांचे मामा दीपक जोगी, दिव्या जोगी, राजेंद्र जोगी, संगीता जोगी, सुरेश जोगी व खुशी यांचे शाल व मिठाई देऊन स्वागत करण्यात आले. कार्यक्रमास आमदार रणधीर सावरकर, खासदार अनुप धोत्रे, महापौर शारदाताई खेडकर, विजय अग्रवाल, जयंत मसने यांच्यासह भाजपचे पदाधिकारी व कार्यकर्ते मोठ्या संख्येने उपस्थित होते.
