चार दिवसांत २ लाख ७ हजार ५०० रुपयांचा दंड; कळंबोली, खारघर, कामोठे व नावडे परिसरातही कारवाई
कळंबोली | प्रतिनिधी : पनवेल महानगरपालिका क्षेत्रातील रस्ते, फुटपाथ व सार्वजनिक जागा अतिक्रमणमुक्त ठेवण्यासाठी पालिका प्रशासनाने अतिक्रमणविरोधी मोहीम तीव्र केली आहे. आयुक्त मंगेश चितळे यांच्या सूचनेनुसार १ ते ४ ऑक्टोबरदरम्यान विविध भागांत कारवाई करून २ लाख ७ हजार ५०० रुपयांचा दंड वसूल करण्यात आला.
कळंबोलीतील सेंट जोसेफ शाळेसमोरील फुटपाथवरील अनधिकृत स्टॉल हटविण्यात आले. तसेच रस्त्यालगत व्यवसाय करणाऱ्या नर्सरी चालकांना अंतिम इशारा देण्यात आला.
खारघरमध्ये अनधिकृत खाद्यविक्रेते व दुकानाबाहेर सार्वजनिक जागेत साहित्य ठेवणाऱ्यांवर कारवाई करून साहित्य जप्त करण्यात आले. कामोठे येथे ३ ऑक्टोबर रोजी झालेल्या कारवाईत २८ हजार रुपये, तर नावडे परिसरात १२ हजार रुपये दंड वसूल करण्यात आला.
रस्ते, फुटपाथ आणि शाळांच्या परिसरातील अतिक्रमणे हटविण्याची मोहीम यापुढेही सुरू राहणार असल्याचे प्रशासनाने स्पष्ट केले आहे. नागरिक व व्यापाऱ्यांनी सार्वजनिक जागांवर अनधिकृतपणे साहित्य ठेवून पादचारी किंवा वाहतुकीला अडथळा निर्माण करू नये, असे आवाहन अतिरिक्त आयुक्त महेश कुमार मेघमाळे यांनी केले आहे.
