आमदार आशुतोष काळे यांच्यासोबत चांदेकसारे येथे पिकांची पाहणी; शेतकऱ्यांना मदतीचे आश्वासन
कोळपेवाडी : प्रतिनिधी – कोपरगाव तालुक्यात निर्माण झालेल्या दुष्काळसदृश परिस्थितीच्या पार्श्वभूमीवर जलसंपदा मंत्री तथा अहिल्यानगर जिल्ह्याचे पालकमंत्री राधाकृष्ण विखे पाटील यांनी चांदेकसारे येथे प्रत्यक्ष शेतकऱ्यांच्या बांधावर जाऊन पिकांची पाहणी केली. आमदार आशुतोष काळे यांनी त्यांना शेतकऱ्यांच्या अडचणींची माहिती देत प्रत्यक्ष परिस्थितीची जाणीव करून दिली.
पावसाअभावी हातातोंडाशी आलेली पिके जळत असल्याने शेतकरी अडचणीत सापडले आहेत. यावेळी विखे पाटील यांनी शेतकऱ्यांशी संवाद साधून त्यांच्या समस्या जाणून घेतल्या. शेतकऱ्यांच्या व्यथा शासनापर्यंत पोहोचविण्यासाठी आमदार काळे यांनी केलेल्या पाठपुराव्याचीही यावेळी माहिती देण्यात आली.
महायुती सरकार शेतकऱ्यांच्या पाठीशी असून त्यांनी धीर सोडू नये. शेतकऱ्यांना जास्तीत जास्त मदत मिळवून देण्यासाठी शासन स्तरावर प्रयत्न केले जातील, असे आश्वासन राधाकृष्ण विखे पाटील यांनी दिले.
यावेळी प्रांत अधिकारी धनंजय बांगर, कृषी अधिकारी मनोज सोनवणे यांच्यासह विविध स्थानिक पदाधिकारी, सरपंच, कृषी व महसूल विभागाचे अधिकारी तसेच शेतकरी उपस्थित होते.
