श्री सिद्धेश्वर देवस्थान ट्रस्ट निवडणुकीत २५ पैकी २५ जागांवर ‘ग्रामदैवत विकास पॅनल’ विजयी
श्रीगोंदा : प्रतिनिधी
श्रीगोंदा तालुक्यातील आढळगाव येथील श्री सिद्धेश्वर देवस्थान ट्रस्टच्या बहुप्रतीक्षित आणि चुरशीच्या निवडणुकीत शरद जमदाडे व उत्तम राऊत यांच्या नेतृत्वाखालील ‘ग्रामदैवत विकास पॅनल’ने ऐतिहासिक विजय मिळवला. पॅनलने २५ पैकी तब्बल २५ जागांवर विजय मिळवत विरोधी पॅनलचा धुव्वा उडविला. विजयी उमेदवारांनी मोठ्या मताधिक्याने बाजी मारल्याने ग्रामदैवत विकास पॅनलच्या कार्यकर्त्यांमध्ये उत्साहाचे वातावरण निर्माण झाले.
या निवडणुकीत एकूण ५ हजार ५० मतदार होते. त्यापैकी ३ हजार ७६० मतदारांनी मतदानाचा हक्क बजावला, म्हणजेच सुमारे ७५ टक्के विक्रमी मतदान झाले. मतमोजणीत २२८ मते बाद ठरली.
तिरंगी लढतीत ग्रामदैवत विकास पॅनलचा विजय
निवडणुकीत तीन पॅनलमध्ये चुरशीची लढत झाली. शरद जमदाडे व उत्तम राऊत यांच्या नेतृत्वाखालील ग्रामदैवत विकास पॅनल, शिवप्रसाद उबाळे यांच्या नेतृत्वाखालील ग्रामदैवत सेवा पॅनल आणि महेंद्र शिंदे यांच्या नेतृत्वाखालील ग्रामदैवत नवक्रांती पॅनल यांच्यात सामना रंगला.
मात्र निकालात ग्रामदैवत विकास पॅनलने सर्व २५ जागांवर विजय मिळवत एकहाती वर्चस्व प्रस्थापित केले.
रात्रभर मतमोजणी; सकाळी सात वाजता विजयी घोषणा
रविवारी सकाळी उत्साहात मतदान प्रक्रिया पार पडली. त्यानंतर सायंकाळी सात वाजता मतमोजणीला सुरुवात झाली. रात्रभर सुरू असलेल्या मतमोजणीमुळे उमेदवार व कार्यकर्त्यांमध्ये उत्सुकता आणि धाकधूक कायम होती. तब्बल १२ तासांच्या मतमोजणीनंतर सोमवारी सकाळी सात वाजता निवडणूक निर्णय अधिकाऱ्यांनी ग्रामदैवत विकास पॅनलच्या विजयाची अधिकृत घोषणा केली.
निकालानंतर आढळगावात जल्लोष
निकाल जाहीर होताच आढळगावात ग्रामदैवत विकास पॅनलच्या समर्थकांनी जल्लोष केला. कार्यकर्त्यांनी फटाक्यांची आतषबाजी करत आणि गुलालाची उधळण करत विजयाचा आनंद साजरा केला.
श्री सिद्धेश्वर देवस्थान ट्रस्टची ही निवडणूक मोठ्या प्रमाणावर चर्चेत राहिली. देवस्थान ट्रस्टच्या निवडणुकीत एवढी मोठी आणि चुरशीची लढत झाल्याने परिसरात या निकालाची विशेष चर्चा सुरू आहे.
संपूर्ण निवडणूक प्रक्रिया शांततेत पार पडावी यासाठी पोलिसांकडून चोख बंदोबस्त ठेवण्यात आला होता. त्यामुळे निवडणूक प्रक्रिया सुरळीत पार पडली आणि कायदा व सुव्यवस्था अबाधित राहिली.
