चारही रिले संघांचा प्रथम क्रमांक; वैयक्तिक प्रकारांतही उल्लेखनीय यश, कोल्हापूर विभागीय स्पर्धेसाठी खेळाडूंची निवड
सावर्डे (प्रतिनिधी) : क्रीडा व युवक सेवा संचालनालय, महाराष्ट्र राज्य, पुणे आणि रत्नागिरी जिल्हा क्रीडा कार्यालय यांच्या संयुक्त विद्यमाने आयोजित १७ वर्षांखालील शालेय मैदानी स्पर्धेत सह्याद्री शिक्षण संस्था संचलित गोविंदराव निकम माध्यमिक व उच्च माध्यमिक विद्यालय, सावर्डे येथील खेळाडूंनी नेत्रदीपक कामगिरी केली. या स्पर्धेत विद्यालयाच्या मुलांच्या व मुलींच्या ४×१०० मीटर आणि ४×४०० मीटर रिले संघांनी प्रथम क्रमांक पटकावला. तसेच वैयक्तिक क्रीडा प्रकारांतही खेळाडूंनी यश संपादन केले. या कामगिरीमुळे अनेक खेळाडूंची कोल्हापूर विभागीय स्पर्धेसाठी निवड झाली असून, ते रत्नागिरी जिल्ह्याचे प्रतिनिधित्व करणार आहेत.
वैयक्तिक प्रकारांत चिन्मयी शिगवण हिने ४००, ८०० आणि १५०० मीटर धावण्याच्या स्पर्धांत प्रथम क्रमांक मिळवत आपल्या कामगिरीचा ठसा उमटवला. शौर्य खापरे याने ११० मीटर हर्डल्समध्ये प्रथम, तर विपुल साळवी याने ४०० मीटरमध्ये प्रथम आणि ८०० मीटरमध्ये तृतीय क्रमांक मिळवला. इच्छा राजभर हिने ३००० मीटरमध्ये द्वितीय आणि १५०० मीटरमध्ये तृतीय क्रमांक पटकावला. भक्ती घडशी हिने १०० मीटर हर्डल्समध्ये तृतीय, पियुष गुरव याने ४०० मीटरमध्ये तृतीय, तर सर्वेश खापरे याने २०० मीटर धावण्याच्या स्पर्धेत तृतीय क्रमांक मिळवला.
सांघिक प्रकारांत मुलींच्या ४×१०० मीटर आणि ४×४०० मीटर रिले संघाने प्रथम क्रमांक मिळवला. या संघात इच्छा राजभर, चिन्मयी शिगवण, मुक्ता भुवड, वंशिका सिंगन आणि भक्ती घडशी यांचा समावेश होता. मुलांच्या दोन्ही रिले संघांनीही प्रथम क्रमांक पटकावला. या संघात विपुल साळवी, सार्थक घडशी, सर्वेश खापरे, शौर्य खापरे आणि पियुष गुरव यांनी उत्कृष्ट कामगिरी केली.
या खेळाडूंना विद्यालयाचे क्रीडाशिक्षक दादासाहेब पांढरे, रोहित गमरे, अमृत कडगावे आणि प्रशांत सकपाळ यांचे मार्गदर्शन लाभले.
या उल्लेखनीय यशाबद्दल सह्याद्री शिक्षण संस्थेचे अध्यक्ष व आमदार शेखरजी निकम, उपाध्यक्ष प्रशांतशेठ निकम, युगंधरा राजेशिर्के, डॉ. इसाक खतीब, कार्याध्यक्ष अनिरुद्ध निकम, सचिव महेश महाडिक, संस्थेचे विश्वस्त व शालेय समितीचे चेअरमन शांताराम खानविलकर, संस्थेचे सर्व पदाधिकारी, शालेय समिती सदस्य, विद्यालयाचे मुख्याध्यापक राजेंद्रकुमार वारे, उपमुख्याध्यापक विजय चव्हाण आणि पर्यवेक्षक महेश कुलकर्णी यांनी यशस्वी खेळाडू व मार्गदर्शक शिक्षकांचे अभिनंदन केले. आगामी विभागीय स्पर्धेसाठीही खेळाडूंना शुभेच्छा देण्यात आल्या.
