आमळीपैकी विसपुडे येथील घटना; सुभाष रूपा बिलारी यांचे मोठे आर्थिक नुकसान, सुदैवाने जीवितहानी नाही
आमळी (विसपुडे) | प्रतिनिधी
शेतातून काढणी केलेले नागली (नाचणी) पीक ट्रॅक्टर-ट्रॉलीतून घरी नेत असताना खाली लटकलेल्या वीज वाहिनीच्या संपर्कात आल्याने पिकाला आग लागली. या भीषण घटनेत आमळीपैकी विसपुडे येथील शेतकरी सुभाष रूपा बिलारी यांच्या वर्षभराच्या मेहनतीचे पीक जळून खाक झाले. सुदैवाने या दुर्घटनेत कोणतीही जीवितहानी झाली नाही; मात्र शेतकऱ्याचे मोठे आर्थिक नुकसान झाले आहे.
वीज वाहिनीच्या संपर्काने लागली आग
मिळालेल्या माहितीनुसार, आमळीपैकी विसपुडे येथील शेतकरी सुभाष रूपा बिलारी यांनी आपल्या शेतातील नागली पिकाची काढणी केली होती. हे पीक ट्रॅक्टर-ट्रॉलीमध्ये भरून ते घरी घेऊन जात होते. दरम्यान, रस्त्याच्या कडेला वीज वाहिन्या खाली लटकलेल्या होत्या. ट्रॅक्टर-ट्रॉली वीज वाहिनीखालून जात असताना नागली पिकाचा वरचा भाग विद्युत तारांच्या संपर्कात आला.
विद्युत प्रवाहामुळे ठिणगी पडून सुक्या नागली पिकाला अचानक आग लागली. आगीने काही क्षणांतच रौद्ररूप धारण केले आणि ट्रॉलीतील संपूर्ण पीक जळून खाक झाले.
शेतकऱ्यावर आर्थिक संकट
वर्षभर कष्ट करून पिकवलेले नागलीचे पीक डोळ्यादेखत जळून खाक झाल्याने शेतकरी सुभाष बिलारी यांच्यावर मोठे आर्थिक संकट ओढवले आहे. सुदैवाने कोणतीही जीवितहानी झाली नसली, तरी मेहनतीचे पीक हातातून गेल्याने शेतकऱ्याचे मोठे नुकसान झाले आहे.
या घटनेची दखल घेऊन संबंधित वीज वितरण कंपनीने खाली लटकलेल्या वीज वाहिन्यांची तातडीने पाहणी करावी आणि नुकसानग्रस्त शेतकऱ्याच्या नुकसानीचा पंचनामा करून योग्य ती नुकसानभरपाई द्यावी, अशी अपेक्षा व्यक्त होत आहे.
