नगराध्यक्षा ऐश्वर्याताई अभिजित पाचर्णे यांच्या परिवाराकडून एक लाख, उपनगराध्यक्ष नितीनदादा पाचर्णे यांच्याकडून ५० हजार, तर महायुतीचे नगरसेवक, नगरसेविका व सभापतींकडून दीड लाख रुपयांची मदत
प्रतिनिधी : शिरूर : संकटाच्या काळात एकमेकांच्या मदतीला धावून जाणे, हीच खरी सामाजिक बांधिलकी असल्याचे उदाहरण शिरूर शहरात पाहायला मिळाले. शहरातील लाटेआळी परिसरात असलेल्या अशोक टाक यांच्या ‘गणेश टॉईज’ या होलसेल दुकानाला दिवाळीच्या दिवशी भीषण आग लागून संपूर्ण दुकान जळून खाक झाले. या दुर्घटनेत अंदाजे ५० ते ६० लाख रुपयांचे आर्थिक नुकसान झाले असून, ऐन सणासुदीच्या काळात टाक कुटुंबावर मोठे संकट कोसळले आहे.
अशोक टाक यांनी अत्यंत प्रतिकूल परिस्थितीत हातगाडीवरून आपल्या व्यवसायाची सुरुवात केली होती. मेहनत, जिद्द आणि चिकाटीच्या जोरावर त्यांनी छोट्या व्यवसायाचे रूपांतर ‘गणेश टॉईज’ या नावारूपाला आलेल्या होलसेल दुकानात केले. अनेक वर्षांच्या कष्टातून उभा केलेला हा व्यवसाय दिवाळीच्या दिवशी आगीत पूर्णपणे उद्ध्वस्त झाल्याने त्यांच्यासमोर पुन्हा नव्याने व्यवसाय उभारण्याचे मोठे आव्हान निर्माण झाले आहे.
या कठीण प्रसंगी अशोक टाक यांना आर्थिक आधार मिळावा आणि त्यांनी पुन्हा व्यवसाय सुरू करावा, यासाठी शिरूरकरांनी एकजुटीने पुढे यावे, असे आवाहन नगराध्यक्षा ऐश्वर्या अभिजित पाचर्णे यांनी केले. त्यांच्या या आवाहनाला सकारात्मक प्रतिसाद देत नगराध्यक्षा ऐश्वर्याताई पाचर्णे यांच्या परिवाराच्या वतीने एक लाख रुपये, उपनगराध्यक्ष नितीनदादा पाचर्णे यांच्या वतीने ५० हजार रुपये, तर महायुतीच्या नगरसेवक, नगरसेविका व सभापती यांच्या वतीने दीड लाख रुपये अशी एकूण तीन लाख रुपयांची आर्थिक मदत अशोक टाक यांना देण्यात आली.
यावेळी नगराध्यक्षा ऐश्वर्याताई अभिजित पाचर्णे, बांधकाम सार्वजनिक समितीचे सभापती सुनीलदादा जाधव, स्वच्छता सभापती एजाजभाई बागवान, नगरसेवक अभिजितकाका पाचर्णे, निलेशदादा गाडेकर, सागर नरवडे, निलेशदादा पवार, महिला व बालकल्याण सभापती आयेशाताई सय्यद, नगरसेविका स्वीटीताई शिंदे, रिंकूताई जगताप, सुनीताताई कुरुंदळे, संगीताताई मल्लाव, सुनिताताई भुजबळ, स्वातीताई साठे, नगरसेवक उमेश शेळके, संतोष थेऊरकर यांच्यासह महायुतीचे नगरसेवक, नगरसेविका व सभापती उपस्थित होते.
उपस्थितांनी आगीत झालेल्या नुकसानीची पाहणी करून अशोक टाक यांना धीर दिला. या मदतकार्याचा पुढाकार आणि समन्वय हलवाई गणेश मित्र मंडळाचे माजी अध्यक्ष अविनाश जाधव यांनी घेतला.
केवळ आर्थिक मदत देणे एवढाच या उपक्रमाचा उद्देश नसून, अनेक वर्षांच्या मेहनतीतून उभा राहिलेला व्यवसाय पुन्हा उभा राहावा आणि अशोक टाक यांना नव्याने सुरुवात करण्याचे बळ मिळावे, या भावनेतून मदतीचा हात पुढे करण्यात आला.
संकट कितीही मोठे असले, तरी समाजाची एकजूट आणि माणुसकीची साथ मिळाली तर पुन्हा नव्याने उभे राहण्याचे बळ मिळते. शिरूरकरांनी दाखवलेल्या या सामाजिक बांधिलकीतून हाच संदेश दिला आहे. आगीत नुकसान झालेल्या अशोक टाक यांचा व्यवसाय पुन्हा सुरू होण्यासाठी समाजातील नागरिकांनीही शक्य ते सहकार्य करावे, असे आवाहन या उपक्रमातून करण्यात आले.
