मिलिंद नगरमधील नवीन रस्त्यासाठी अतिक्रमण हटविण्यास सुरुवात; गोरगरीब नागरिकांवर अन्याय होऊ नये, स्थानिकांची भूमिका
मेहकर | प्रतिनिधी : मेहकर शहरातील मिलिंद नगरकडे जाणाऱ्या नवीन रस्त्याच्या कामासाठी नगरपालिकेकडून अतिक्रमण हटविण्याची कारवाई सुरू करण्यात आली आहे. सेंट्रल बँक ते डीपी रोड, मेहकरपर्यंतच्या मुख्य रस्त्याचे ७.५ मीटर रुंदीकरण करून नवीन रस्ता तयार करण्याचे काम प्रस्तावित आहे. या कारवाईमुळे परिसरातील गोरगरीब आणि सर्वसामान्य नागरिकांच्या मालमत्तेचे नुकसान होण्याची शक्यता असल्याने नुकसानभरपाई देण्याची मागणी नागरिकांकडून होत आहे.
शहराचा विकास, रस्त्यांचे रुंदीकरण आणि नागरिकांना चांगल्या सुविधा उपलब्ध होणे ही स्वागतार्ह बाब आहे. मात्र, विकासकामे करताना सर्वसामान्य नागरिकांच्या हक्कांचाही विचार होणे आवश्यक आहे. रस्त्याच्या कामासाठी अतिक्रमण हटविताना संबंधित नागरिकांना विश्वासात घेण्यात आले आहे का? त्यांच्या होणाऱ्या नुकसानीची भरपाई कशी दिली जाणार? असे प्रश्न स्थानिक नागरिकांकडून उपस्थित केले जात आहेत.
नगरपालिकेने अतिक्रमण हटविण्याची कारवाई करताना कोणत्याही गोरगरीब कुटुंबावर अन्याय होणार नाही, याची दक्षता घ्यावी. ज्या नागरिकांच्या मालमत्तेचे किंवा बांधकामाचे नुकसान होणार आहे, त्यांना नियमानुसार योग्य मोबदला देण्यात यावा, अशी मागणी स्थानिकांनी केली आहे.
विकासकामांना नागरिकांचा विरोध नाही; मात्र विकासाच्या नावाखाली गोरगरीबांच्या संसारावर घाला घालणे योग्य ठरणार नाही. नगरपालिकेने कारवाईत पारदर्शकता ठेवून नुकसानग्रस्त नागरिकांना न्याय द्यावा, अशी अपेक्षा मिलिंद नगर परिसरातील नागरिक व्यक्त करीत आहेत.
या कारवाईवेळी नगरपालिकेचे कर्मचारी उपस्थित होते. त्यामध्ये विशाल शिरपूरकर, जावेद गवळी, अख्तर भाई, अनिल मुळे यांच्यासह इतर कर्मचारी सहभागी होते.
आता नगरपालिकेचे प्रशासन नागरिकांच्या मागणीची कितपत दखल घेते आणि संभाव्य नुकसानग्रस्तांना कशा प्रकारे न्याय देते, याकडे परिसरातील नागरिकांचे लक्ष लागले आहे.










