व्हायरल फोटोबद्दल खा.संजय देशमुख यांचा खुलासा

मानोरा प्रतिनिधी /विशाल मोरे

मानोरा : यवतमाळ-वाशिम लोकसभा मतदारसंघातील माझ्या आदरणीय मतदार बंधू-भगिनींनो,

सध्या आपल्या मतदारसंघात एक फोटो आणि त्यासोबतचा मजकूर खूप मोठ्या प्रमाणात व्हायरल होत आहे. या फोटोविषयी खूप चर्चाही रंगल्या आहेत. मी महाविकास आघाडीचा लोकप्रतिनिधी असल्याने, काही विरोधी लोक या प्रसंगाचा चुकीचा अर्थ लावून, समाजात अफवा पसरवण्याचा प्रयत्न करत आहेत. अशा अफवांवर विश्वास ठेवण्याऐवजी, वास्तव काय आहे ते समजून घेणे महत्त्वाचे आहे.

मी यवतमाळ-वाशिम लोकसभा मतदारसंघाचा लोकप्रतिनिधी म्हणून, मला मतदारसंघातील कोणताही व्यक्ती भेटू शकतो, मतदारसंघातील कोणत्याही व्यक्तीने माझ्याशी संवाद साधला तरी त्याचा सन्मानपूर्वक आदर करणे हे माझे नैतिक कर्तव्य आहे. आपली भारतीय संस्कृती देखील याच शिकवणीवर आधारलेली आहे—सर्वांशी समानतेने आणि आदराने वागणे.

माझे कर्तव्य फक्त निवडणुकीच्या वेळी मतं मागण्यापुरते मर्यादित नाही, तर मला कोणत्याही पक्षाचा असो किंवा अन्य कोणत्याही विचारधारेचा असो, सर्व मतदारांच्या समस्या ऐकणे आणि त्यांचे निराकरण करण्यासाठी प्रयत्न करणे हे माझे काम आहे. मी कोणत्याही एकाच व्यक्तीचा किंवा गटाचा प्रतिनिधी नाही, तर संपूर्ण मतदारसंघातील जनतेचा प्रतिनिधी आहे.

दुर्दैवाने, सध्या काही विरोधक राजकीय हेतूने या भेटीचे वेगवेगळे चुकीचे अर्थ लावून समाजात गोंधळ पसरवत आहेत. कृपया अशा खोट्या प्रचाराला बळी पडू नका. अशा प्रकारच्या अफवांचा उद्देश लोकांमध्ये फूट पाडणे आणि विकासाच्या प्रक्रियेपासून लक्ष विचलित करणे असतो.

आपल्याला सर्वांना विनंती आहे की, अशा अफवांवर विश्वास ठेवू नका. जर काही शंका असतील, तर तुम्ही थेट माझ्याशी संपर्क साधू शकता. मी नेहमी तुमच्या सेवेत हजर आहे.

बॉक्स …
आपल्या सहकार्यानेच आपण एक मजबूत आणि प्रगतीशील मतदारसंघ घडवू शकतो. सत्य काय आहे हे ओळखा आणि आपल्या क्षेत्राच्या विकासासाठी पुढे चला.
श्री.संजय उत्तमराव देशमुख
खासदार यवतमाळ- वाशिम