शिवसेनेच्या वतीने मोफत नेत्र तपासणी, मोतीबिंदू शस्त्रक्रिया, चष्मा वाटप व आरोग्य तपासणी शिबिराचे आयोजन..

(ता.प्र) शेख मोईन..

किनवट :

किनवट-माहूर विधानसभेतील शहर व ग्रामीण भागात नागरिकांच्या सेवेकरिता भव्य मोफत नेत्र तपासणी, मोतीबिंदू शस्त्रक्रिया, चष्मा वाटप व आरोग्य तपासणी शिबिराचे शिवसेना (उद्धव बाळासाहेब ठाकरे) पक्षाचे जिल्हाप्रमुख जोतिबा खराटे यांच्या संकल्पनेतून व लोककल्याण आरोग्य केंद्र, मुंबई शिवसेना, किनवट-माहूर विधानसभा, लोककल्याण बहुद्देशीय संस्था यांच्या संयुक्त विद्यमाने रविवार ९ मार्च ते १८ मार्च रोजीपर्यंत आयोजन करण्यात आले आहे. ९ मार्च रोजी माहूर तालुक्यातील वानोळा ग्रामपंचायत कार्यालयात तर १० मार्च रोजी माहूर येथील जुन्या नगरपंचायत कार्यालयात, ११ मार्च रोजी वाईबाजार येथील ग्रामपंचायत कार्यालयात सकाळी ९ ते ५ या वेळेत हे शिबिर होणार आहे. किनवट तालुक्यात बुधवार १२ मार्चला संत सेवालाल मंदीर (मांडवी), १३ मार्चला हनुमान मंदिराजवळ तंटामुक्ती भवन उमरी (बा.), १५ मार्चला ग्रामपंचायत कार्यालय गोकुंदा (किनवट), १६ मार्च रोजी शिवाजीराजे मंगल कार्यालय बसस्टँडजवळ (किनवट), १७मार्च रोजी विठ्ठलेश्वर मंदिर (बोधडी, बु.), १८ मार्च रोजी ग्रामपंचायत कार्यालय (इस्लापूर) येथे सकाळी ९ ते ५ या वेळेत आयोजन करण्यात आले आहे. या शिबिरात मोफत नेत्र तपासणी, मोतीबिंदू शस्त्रक्रिया, चष्मा वाटप व आरोग्य तपासणी तसेच सर्दी, ताप, खोकला, सांधेदुखी, पोटदुखी, डोकेदुखी, रक्तदाब, रक्त शर्करा, अॅसिडिटी, नेत्र तपासणी त्याच बरोबर ज्येष्ठ नागरिकांचे विकार आदी तपासण्या मोफत करण्यात येणार आहेत. या शिबिरामध्ये आरोग्य तपासणी व नेत्र तपासणी करून औषधे मोफत दिली जातील. तरी या शिबिराचा किनवट-माहूर विधानसभेतील नागरिकांनी लाभ घ्यावा, असे आवाहन जिल्हाप्रमुख जोतिबा खराटे, उपजिल्हाप्रमुख अनिल रुणवाल, तालुकाप्रमुख मारोती दिवसे पाटील, माहूर तालुकाप्रमुख उमेश जाधव, शहरप्रमुख प्रशांत कोरडे, माहूर शहर प्रमुख नीरधारी जाधव यांच्यासह सर्व शिवसेना, युवासेना पदाधिकारी व कार्यकर्ते शिवसेना (उद्धव बाळासाहेब ठाकरे) किनवट माहूर तालुका यांनी केले आहे..