जत शहरात बेकायदेशीर गौण खनिज उत्खननाचा पर्दाफाश; उपनगराध्यक्षांची तक्रार
प्रशासनाचा लाखो रुपयांचा महसूल बुडाला; दोषींवर फौजदारी कारवाई करण्याची विक्रम ताड यांची मागणी
जत (प्रतिनिधी):
जत शहर आणि परिसरात गेल्या अनेक दिवसांपासून मोठ्या प्रमाणावर बेकायदेशीर गौण खनिज उत्खनन सुरू असून, यामुळे शासनाचा लाखो रुपयांचा महसूल बुडत आहे. या गंभीर प्रकरणाचा पर्दाफाश करत जत नगरपरिषदेचे उपनगराध्यक्ष विक्रम ताड यांनी उपविभागीय अधिकाऱ्यांकडे लेखी तक्रार दाखल केली असून, दोषींवर तातडीने फौजदारी कारवाई करण्याची मागणी केली आहे.
रॉयल्टी न भरता हजारो ब्रासची चोरी
विक्रम ताड यांनी दिलेल्या निवेदनात नमूद केले आहे की, शहरात माती, दगड, मुरूम आणि वाळूचे बेकायदेशीर उत्खनन मोठ्या प्रमाणावर सुरू आहे. शासनाचे नियम धाब्यावर बसवून आणि कोणतीही रॉयल्टी न भरता हजारो ब्रास गौण खनिजाची चोरी केली जात आहे. विशेषतः प्रभाग क्रमांक ६ मधील शेगाव रोडवरील सैनिक नगर परिसरात हे बेकायदेशीर काम राजरोसपणे सुरू असल्याचे तक्रारीत म्हटले आहे.
प्रशासनाचे मोठे आर्थिक नुकसान
शासनाच्या मालमत्तेची लूट करून पर्यावरणाचा ऱ्हास केला जात आहे. या उत्खननामुळे रस्ते आणि नागरी सुविधांवरही परिणाम होत आहे. “शासनाची फसवणूक करणाऱ्या या माफियांची सखोल चौकशी व्हावी आणि त्यांच्याकडून दंड वसूल करून फौजदारी गुन्हे दाखल करावेत,” अशी ठाम मागणी विक्रम ताड यांनी केली आहे.
भाजप पदाधिकाऱ्यांची उपस्थिती
या तक्रारीवेळी भाजप युवानेते किरण मामा शिंदे, भाजप नेते अविनाश सोनोले, अनिल पारसे, पिंटू स्वामी यांसह अनेक मान्यवर उपस्थित होते. या निवेदनाची प्रत सांगली येथील जिल्हा खणकर्म अधिकारी आणि जिल्हाधिकारी कार्यालयालाही माहितीसाठी पाठवण्यात आली आहे.
लोकप्रतिनिधींनी थेट आक्रमक पवित्रा घेतल्याने आता प्रशासन या अवैध उत्खननावर काय कारवाई करणार, याकडे जतच्या नागरिकांचे लक्ष लागले आहे.
