🌟 महाविज्ञान प्रदर्शनात भादवण हायस्कूलची दैदीप्यमान झेप

भादवण : प्रतिनिधी
शिवतेज तरुण मंडळ, शेळपवाडी आयोजित विज्ञान व तंत्रज्ञान या मुख्य विषयावर आधारित महाविज्ञान प्रदर्शनात भादवण हायस्कूल, भादवण या विद्यालयाने उल्लेखनीय यश संपादन करत सर्वांचे लक्ष वेधून घेतले. विद्यार्थ्यांच्या कल्पकता, जिद्द आणि मार्गदर्शक शिक्षकांच्या प्रभावी मार्गदर्शनामुळे विद्यालयाने ही उल्लेखनीय कामगिरी साध्य केली.
इयत्ता आठवी ते बारावी या मोठ्या गटामध्ये इयत्ता नववीतील तन्मय किशन देवरकर याने तयार केलेल्या “स्मार्ट स्ट्रीट लाईट; सोलर एनर्जी सेवर” या प्रकल्पास द्वितीय क्रमांक प्राप्त झाला. हे उपकरण सौरऊर्जेवर आधारित स्वयंचलित प्रणाली असून दिवसाच्या वेळी सौर पॅनलद्वारे ऊर्जा साठवून रात्री आपोआप प्रकाश देते. ऊर्जा बचत, पर्यावरण संरक्षण आणि ग्रामीण भागातील वीज समस्येवर उपाय म्हणून हा प्रकल्प उपयुक्त ठरू शकतो.
तसेच इयत्ता आठवीतील आदेश दत्तात्रय पाटील याने सादर केलेल्या “स्वयंचलित अग्निशमन यंत्र” या अभिनव प्रकल्पानेही परीक्षकांची मने जिंकली. आग लागल्यास सेन्सरच्या मदतीने तात्काळ पाणी किंवा अग्निरोधक द्रव फवारून आग आटोक्यात आणणारी ही प्रणाली विशेषतः शाळा, कार्यालये व घरांसाठी उपयुक्त ठरू शकते. या प्रकल्पासाठी दिगंबर दत्तात्रय पाटील यांचे सहकार्य लाभले. आपत्कालीन परिस्थितीत मानवी हस्तक्षेपाशिवाय कार्य करणारी ही प्रणाली प्रभावी असल्याचे परीक्षकांनी नमूद केले.
उत्कृष्ट सादरीकरण व अभिनव संकल्पनांमुळे विद्यार्थ्यांना प्रमाणपत्र, ट्रॉफी व रोख तीन हजार रुपयांचे बक्षीस देऊन गौरविण्यात आले.
या यशामागे विज्ञान विषय शिक्षक प्रशांत गुरव यांचे मार्गदर्शन लाभले. मुख्याध्यापक राजेंद्र कुंभार यांचे प्रोत्साहन तसेच शिक्षकवृंदाचे सहकार्य मिळाले. आजरा महाल शिक्षण मंडळाचे अध्यक्ष जयवंतराव शिंपी, उपाध्यक्ष के. जी. पटेकर, सचिव अभिषेकदादा शिंपी, खजिनदार सुनील पाटील व सर्व संचालक यांची प्रेरणा लाभली.
भादवण ग्रामस्थ व पालकांनी विद्यार्थ्यांचे कौतुक करत त्यांच्या उज्ज्वल भविष्यास शुभेच्छा दिल्या. विद्यार्थ्यांच्या या यशामुळे इतर विद्यार्थ्यांनाही विज्ञान-तंत्रज्ञान व नवोपक्रम क्षेत्रात पुढे जाण्याची प्रेरणा मिळणार आहे.