प्रतिनिधी – शहादा
शिरपूर तालुका पोलिसांनी प्रतिबंधित तंबाखू व पानमसाला वाहतूक करणाऱ्या आरोपीस अटक करत सुमारे ३ लाख १९ हजार ५१० रुपयांचा साठा जप्त केला आहे. तसेच २० लाख रुपये किंमतीचे लक्झरी वाहन ताब्यात घेण्यात आले.
राज्यात बंदी असलेला पानमसाला इंदौरहून पुण्याकडे लक्झरी बसने नेण्यात येणार असल्याची गोपनीय माहिती पोलिस निरीक्षक जयपाल हिरे यांना मिळाली होती. त्यानुसार मुंबई–आग्रा महामार्ग क्रमांक ५२ वर सापळा रचण्यात आला.
बुधवारी (दि. १८) पहाटे एमपी ४४ झेडएफ ३७५८ क्रमांकाच्या लक्झरी बसची तपासणी केली असता विविध कंपनींचा पानमसाला व तंबाखू असा एकूण ३,१९,५१० रुपयांचा मुद्देमाल आढळून आला. वाहनाची अंदाजे किंमत २० लाख रुपये असल्याचे सांगण्यात आले.
कॉन्स्टेबल मुकेश पावरा यांच्या फिर्यादीवरून चालक महेंद्र अनाराम चौधरी (वय ३४, रा. मुनदियार, ता. जि. नागोर, राजस्थान) यास अटक करण्यात आली आहे. तसेच अज्ञात माल टाकणारा व उतरवणारा यांच्या विरोधात गुन्हा दाखल करण्यात आला आहे.
ही कारवाई धुळे जिल्हा पोलिस अधीक्षक श्रीकांत धीवरे, अपर पोलिस अधीक्षक अजय देवरे व उपविभागीय पोलिस अधिकारी सुनील गोसावी यांच्या मार्गदर्शनाखाली पोलिस निरीक्षक जयपाल हिरे व त्यांच्या पथकाने केली.
