🔴 🟠🔵 व्यंकटराव शिक्षण संकुलात शिवजयंती उत्साहात संपन्न 🔵🟠🔴

आजरा : प्रतिनिधी,
आजरा येथील व्यंकटराव शिक्षण संकुलामध्ये जाणता राजा छत्रपती शिवाजी महाराज यांच्या जयंतीनिमित्त कार्यक्रम मोठ्या उत्साहात संपन्न झाला. यावेळी छत्रपती शिवाजी महाराज यांच्या प्रतिमेचे पूजन आजरा महाल शिक्षण मंडळाचे संचालक श्री. सुधीर जाधव यांच्या हस्ते करण्यात आले. कार्यक्रमास संचालक श्री. पांडुरंग जाधव, श्री. सचिन शिंपी, श्री. विलास पाटील हे मान्यवर उपस्थित होते.
यावेळी मार्गदर्शन करताना प्राध्यापक केतन सुतार यांनी शिवरायांच्या जन्माची ऐतिहासिक पार्श्वभूमी प्रभावी शब्दांत मांडली. परकीय सत्तांच्या जुलूम, लढाया, जाळपोळ व लुटालुटीमुळे महाराष्ट्र होरपळून निघालेला असताना, त्या अंधाऱ्या काळात शिवनेरी किल्ल्यावर जिजामातांच्या पोटी १९ फेब्रुवारी १६३० रोजी शिवरायांचा जन्म झाला, असे त्यांनी सांगितले. जिजाऊंच्या संस्कारातून घडलेल्या शिवरायांनी मावळ्यांच्या साथीने स्वराज्य स्थापन करत अनेक गड-किल्ले जिंकून महाराष्ट्राला परकीय सत्तेतून मुक्त केले, असेही त्यांनी नमूद केले.
यानंतर व्ही. टी. कांबळे यांनी छत्रपती शिवाजी महाराजांची शौर्यगाथा आपल्या स्वरचित काव्यातून व चालीतून सादर करत उपस्थितांना मंत्रमुग्ध केले.
या जन्मोत्सव सोहळ्यासाठी प्रतिमा पूजनाच्या वेळी प्राचार्य एम. एम. नागुर्डेकर, पर्यवेक्षिका सौ. व्ही. जे. शेलार, ज्युनिअर कॉलेज विभाग प्रमुख श्री. एम. ए. पाटील, प्राथमिक मुख्याध्यापक श्री. आर. व्ही. देसाई, सीनिअर कॉलेज विभाग प्रमुख श्री. खामकर सर यांच्यासह सर्व शिक्षक-शिक्षिका व शिक्षकेतर कर्मचारी मोठ्या संख्येने उपस्थित होते.
🟠🔵 शिवजयंतीनिमित्त संकुलात शिवमय वातावरण निर्माण झाले होते. 🔵🟠