टिटवाळा रिजन्सी संकुलात छत्रपती शिवाजी महाराजांच्या जयंतीचा उत्साहपूर्ण उत्सव साजरा…
टिटवाळा (कल्याण):प्रफुल्ल शेवाळे
टिटवाळा, २० फेब्रुवारी २०२६: टिटवाळा येथील रिजन्सी संकुल मध्ये छत्रपती शिवाजी महाराजांच्या ३९६व्या शिवजयंतीनिमित्त आज भव्य आणि उत्साहपूर्ण कार्यक्रमाचे आयोजन करण्यात आले. संकुलातील रहिवासी आणि स्थानिक नागरिकांनी एकत्र येऊन शिवरायांच्या जयंतीचा उत्सव मोठ्या जल्लोषात साजरा केला.
सकाळी लवकर सुरू झालेल्या कार्यक्रमात छत्रपती शिवाजी महाराजांच्या प्रतिमेचे पूजन, आरती आणि पारंपरिक पाळणा सोहळा घेण्यात आला. संकुलातील बालकांनी शिवगीते, पोवाडे आणि भजने सादर करून वातावरण शिवमय केले. ‘जय भवानी, जय शिवाजी’च्या घोषणांनी संपूर्ण परिसर दणाणून गेला होता. स्थानिक शिवप्रेमी कलाकार विशाल सदाफुले यांनी महाराजांची छबी अतिशय सुंदरतेने साकारली होती. सकाळच्या सत्रात पार पडलेल्या रॅली मध्ये लहान मुले, महिला वर्ग आणि नागरिक शिवरायांना मुजरा करत नतमस्तक होताना दिसत होते.
संकुलाच्या व्यवस्थापन समितीने सांगितले की, “शिवरायांचे शौर्य, दूरदृष्टी आणि स्वराज्याचे तत्त्वज्ञान आजही आम्हाला प्रेरणा देतात. या उत्सवातून आम्ही युवा पिढीला महाराजांच्या आदर्शांचे महत्त्व समजावून सांगतो.” कार्यक्रमात पारंपरिक लेझिम नृत्य, ढोल-ताशांचा गजर आणि भव्य मिरवणूक काढण्यात आली.
जयंती व्यवस्थापन समितीकडून प्रसादाचे वाटपही करण्यात आले.
संध्याकाळी झालेल्या शिवराज्यभिषेक या सांस्कृतिक कार्यक्रमात स्थानिक कलाकारांनी शिवचरित्रावर आधारित छोटे नाट्य तसेच शिवकालीन गाणी सादर करण्यात आली. उत्सवात सहभागी झालेल्या रहिवाशांनी सांगितले की, “रिजन्सी संकुलात अशा प्रकारे सांस्कृतिक कार्यक्रम नियमित होतात, पण शिवजयंतीचा उत्सव खास असतो. यंदा सर्वांनी खूप उत्साह दाखवला.”
टिटवाळा शहरातच नव्हे तर परिसरातील अनेक सोसायट्या आणि मंडळांतर्फे शिवजयंती उत्साहात साजरी होत असून, रिजन्सी संकुलातील हा उत्सव स्थानिक पातळीवर एक आदर्श ठरला आहे.
महाराष्ट्र पोलीस दलाने संपूर्ण कार्यक्रम करिता चोख बंदोबस्त ठेवत आपली कामगिरी पार पाडली. यावेळी कल्याण तालुका पोलीस निरीक्षक पंकज गिरी यांनी जनतेला शिवजयंती च्या शुभेच्छा देत स्वतः संपूर्ण सोहळ्यामध्ये जातीने लक्ष दिले असल्याचे पहायला मिळाले.
