सोलापूर (प्रतिनिधी):
दहावीचा पहिला मराठीचा पेपर आणि त्याच दिवशी वडिलांचे दुःखद निधन… अशा अत्यंत वेदनादायी प्रसंगातही मनोबल न ढळू देता परीक्षा देणाऱ्या धनश्री पवार हिच्या जिद्दीला सर्वत्र सलाम केला जात आहे. सोलापूर येथील शरदचंद्र पवार प्रशाला या शाळेत इयत्ता दहावीमध्ये शिकणारी धनश्री भिकाजी पवार हिच्या आयुष्यातील हा प्रसंग अत्यंत हृदयद्रावक ठरला.
शुक्रवारी सकाळी तिच्या वडिलांचे, भिकाजी पवार यांचे अल्पशा आजाराने निधन झाले. घरात शोककळा पसरली. नातेवाईक आणि शेजारी अंत्यविधीसाठी जमू लागले. त्याच दिवशी धनश्रीचा मराठीचा पहिला पेपर होता. तिच्या वडिलांनी तिच्याकडून मोठ्या अपेक्षा ठेवलेल्या होत्या. त्यामुळे हा पेपर बुडू नये, अशी सर्वांची इच्छा होती.
प्रशालेचे मुख्याध्यापक तानाजी माने यांनी परिस्थितीची गंभीरता लक्षात घेत स्वतः धनश्रीच्या घरी भेट दिली. त्यांनी कुटुंबीयांना समजावून सांगत अंत्यविधीची वेळ दोन तास पुढे ढकलण्याची विनंती केली. कुटुंबीयांनीही शिक्षणाच्या महत्त्वाला प्राधान्य देत सकारात्मक निर्णय घेतला. मुख्याध्यापकांनी धनश्रीला धीर देत तिला स्वतः परीक्षा केंद्रावर नेले.
तीन तास पूर्ण बसणे धनश्रीसाठी शक्य नव्हते. त्यामुळे शिक्षणाधिकारी सचिन जगताप यांना संपर्क साधून परिस्थितीची माहिती देण्यात आली. त्यांनीही संवेदनशीलतेने निर्णय घेत केंद्रप्रमुख श्रीमती गीता सादुल यांना धनश्रीला अर्ध्या वेळेत परीक्षा संपवण्याची परवानगी देण्याचे निर्देश दिले. स्वतः शिक्षणाधिकारी केंद्रावर येऊन धनश्रीला धीर देत तिचे मनोबल वाढवले.
धनश्रीने दीड तासात आपला पेपर पूर्ण केला. त्यानंतर मुख्याध्यापक तानाजी माने यांनी संतोष लोंढे या सेवकाच्या वाहनाने तिला परत अंत्यविधीसाठी घरी आणले. एवढ्या मोठ्या दुःखातही शिक्षणाप्रती असलेली तिची निष्ठा आणि जिद्द पाहून उपस्थित नातेवाईक, शिक्षक, शाळा प्रशासन आणि परिसरातील नागरिकांचे डोळे पाणावले.
धनश्री पवार हिच्या या धैर्यपूर्ण कृतीने शिक्षणाचे महत्त्व आणि संकटसमयीही न ढळणारे मनोबल याचे प्रेरणादायी उदाहरण समाजासमोर ठेवले आहे. तिच्या उज्ज्वल भवितव्यासाठी सर्वत्र शुभेच्छांचा वर्षाव होत आहे.
