दापोली | दि. १९ (प्रतिनिधी)दापोली तालुक्यातील समुद्रकिनारी वसलेल्या आडे गावात शिवभक्त मंडळाच्या वतीने छत्रपती शिवाजी महाराजांचा शिवजन्मोत्सव मोठ्या उत्साहात आणि जल्लोषात साजरा करण्यात आला. नारळी-पोफळीच्या हिरव्यागार बागांनी नटलेल्या आणि अरबी समुद्राच्या सान्निध्यात वसलेल्या या गावात शिवरायांच्या जयघोषाने संपूर्ण परिसर दुमदुमला होता.
गेल्या सहा वर्षांपासून गावातील तरुण पिढीच्या पुढाकारातून शिवजयंती उत्सवाचे आयोजन केले जात असून, यंदाही ग्रामस्थांचा उत्स्फूर्त सहभाग लाभला. सकाळी १० वाजता शिवरायांच्या मूर्तीची विधिवत प्रतिष्ठापना करण्यात आली. दुपारी १२ वाजता मंत्रोच्चारात पूजा व आरती संपन्न झाली. उपस्थित मान्यवरांचा सत्कार करण्यात आला तसेच शालेय विद्यार्थ्यांनी शिवचरित्रावर आधारित प्रभावी भाषणे सादर केली.
दुपारी ३ वाजता ढोल-ताशांच्या गजरात भव्य मिरवणूक काढण्यात आली. भगव्या पताकांनी सजलेले गाव आणि “जय भवानी, जय शिवाजी”च्या घोषणांनी वातावरण शिवमय झाले होते. उपस्थितांसाठी महाप्रसादाचे आयोजन करण्यात आले होते.
या उत्सवाच्या यशस्वी आयोजनासाठी शिवभक्त मंडळाचे अध्यक्ष सोहम परकर, उपाध्यक्ष पार्थ मुरुडकर, सचिव सुरज खोत व रोहित खातू, खजिनदार अमित मुरुडकर यांनी विशेष परिश्रम घेतले. तसेच श्री राम मंडळ व श्री राम महिला मंडळ, आडे यांचेही मोलाचे सहकार्य लाभले.
समुद्रकिनारी निसर्गरम्य वातावरणात साजरा झालेला हा शिवजन्मोत्सव सामाजिक ऐक्य, संस्कृती जतन आणि तरुणांच्या एकजुटीचे प्रतीक ठरला.
दापोली : समुद्रकिनारी वसलेल्या आडे येथे शिवभक्त मंडळाच्या पुढाकाराने शिवजन्मोत्सव जल्लोषात
