चिखला येथील घटनेचा संताप उसळला! राहेरी बु. गाव पूर्ण ठप्प; ग्रामस्थांचा एल्गार, न्याय मिळाल्याशिवाय शांत बसणार नाही इशारा
सिंदखेडराजा / ज्ञानेश्वर तिकटे
सिंदखेडराजा :- आज तालुक्यातील राहेरी बु, येथे चिखला गावामध्ये घडलेल्या धक्कादायक घटनेच्या निषेधार्थ राहेरी बु. गावात आज अभूतपूर्व असा कडकडीत बंद पाळण्यात आला. संतप्त ग्रामस्थांनी संपूर्ण गाव ठप्प करून तीव्र संताप व्यक्त केला. सकाळपासूनच गावातील सर्व दुकाने, बाजारपेठ आणि दैनंदिन व्यवहार पूर्णपणे बंद ठेवण्यात आले होते.
या बंदमध्ये महिला, युवक, शेतकरी तसेच ज्येष्ठ नागरिक मोठ्या संख्येने सहभागी झाले. ग्रामस्थांनी एकजूट दाखवत संबंधित घटनेचा तीव्र निषेध नोंदवला आणि दोषींवर तात्काळ कठोर कारवाई करण्याची मागणी केली. “दोषींना शिक्षा झाल्याशिवाय आम्ही शांत बसणार नाही,” असा इशारा संतप्त नागरिकांनी दिला.
या निषेध बंद दरम्यान गावातील बाजारपेठ, दुकाने तसेच इतर सर्व व्यवहार पूर्णपणे ठप्प होते. ग्रामस्थांनी एकत्र येत संबंधित घटनेचा निषेध नोंदवला आणि अशा प्रकारच्या घटना पुन्हा घडू नयेत, अशी भावना व्यक्त केली. गावातील महिला, युवक तसेच ज्येष्ठ नागरिक मोठ्या संख्येने या निषेध कार्यक्रमात सहभागी झाले होते.
गावातील वातावरण दिवसभर तणावपूर्ण आणि शांततापूर्ण होते. ग्रामस्थांनी प्रशासनाच्या भूमिकेबाबत नाराजी व्यक्त करत न्याय मिळावा, अन्यथा आणखी तीव्र आंदोलन छेडण्याचा इशाराही दिला.
राहेरी बु. गावकऱ्यांनी दाखवलेली ही एकजूट आणि आक्रमक भूमिका प्रशासनासाठी मोठा इशारा मानला जात आहे. आता प्रशासन या प्रकरणात काय भूमिका घेते, याकडे संपूर्ण परिसराचे लक्ष लागले आहे.
