कानडी : जि.प. शाळा कानडी, कानेश्वर विद्यालय तसेच ग्रामपंचायत कानडी यांच्या संयुक्त विद्यमाने आयोजित वार्षिक स्नेहसंमेलन कार्यक्रम कानडी येथे मोठ्या उत्साहात आणि जल्लोषात पार पडला. दरवर्षीप्रमाणे यंदाही विद्यार्थ्यांच्या विविध कलागुणांनी सजलेला हा कार्यक्रम ग्रामस्थांच्या उत्स्फूर्त प्रतिसादात यशस्वीरीत्या संपन्न झाला.
कार्यक्रमाच्या अध्यक्षस्थानी रंजीत पाटील साहेब होते. प्रमुख पाहुणे म्हणून केंद्रप्रमुख चोरे सर, अशोक राऊत, डॉ. दिनकर राऊत, भारतीय जनता पक्षाचे तालुकाध्यक्ष भगवान केदार, कृषी उत्पन्न बाजार समितीचे उपसभापती डॉ. वासुदेव नेहरकर, भाजप युवा नेते सुरज भैय्या घुले, डी.डी. बनसोडे सर, सोनवणे सर तसेच इतर मान्यवर उपस्थित होते.
कार्यक्रमात बोलताना केंद्र प्रमुख चौरे सर म्हणाले कि पालकांनी आपला मुलगा असेल किंवा मुलगी हे आपल्या गावात जि.प.शाळेतच शिकवला पाहिजे.कारण विद्यार्थ्यांना योजना आणि सुविधा या जि.प.शाळेतच मिळतात व त्याबरोबर विद्यार्थ्यांचा सर्वांगीण विकास,शाळेची गुणवत्ता देखील सुधारण्याच काम जि. प.शाळेमध्ये होत आहे.
विद्यार्थ्यांनी सादर केलेल्या सांस्कृतिक कार्यक्रमांमध्ये देशभक्तिपर गीत, नृत्य, नाटिका आणि सामाजिक विषयांवरील सादरीकरणांचा समावेश होता. उपस्थित मान्यवरांनी विद्यार्थ्यांचे कौतुक करून त्यांना पुढील वाटचालीसाठी शुभेच्छा दिल्या. शिक्षणासोबतच सांस्कृतिक व सामाजिक जाणीवा विकसित करण्यासाठी अशा उपक्रमांचे महत्त्व त्यांनी आपल्या मनोगतातून अधोरेखित केले.
कार्यक्रमाच्या यशस्वी आयोजनाबद्दल शिक्षकवृंद, ग्रामपंचायत सदस्य व पालकांचे विशेष कौतुक करण्यात आले. ग्रामस्थांच्या सहकार्यामुळे हा सोहळा अविस्मरणीय ठरला.
