घरच्या परड्यातून शेतीची ओळख — अजित हरेर यांचे प्रेरणादायी व्याख्यान**
आजरा: प्रतिनिधी
येथील पर्यावरण सेवा योजना अंतर्गत विद्यार्थ्यांसाठी नैसर्गिक व पारंपारिक शेती या विषयावर मार्गदर्शनपर व्याख्यानाचे आयोजन करण्यात आले होते. या व्याख्यानात व्याख्याते श्री. अजित जीवबा हरेर यांनी अत्यंत सोप्या, रंजक व प्रत्यक्ष उदाहरणांच्या माध्यमातून विद्यार्थ्यांना शेतीविषयक मौल्यवान माहिती दिली.
आजची पिढी हळूहळू शेतीपासून दूर जात असली, तरी घरात सहज उपलब्ध असलेल्या साहित्याचा वापर करून परड्यात, अंगणात किंवा टेरेसवर छोट्या स्वरूपात भाजीपाला कसा पिकवता येतो, याचे प्रात्यक्षिक स्वरूपातील मार्गदर्शन त्यांनी केले. रासायनिक खत व सेंद्रिय खत यातील मूलभूत फरक, सेंद्रिय खत तयार करण्याच्या पद्धती, पिकांना पाणी देण्याचे योग्य प्रमाण व वेळ तसेच रासायनिक खतांमुळे मानवी आरोग्यावर होणारे दुष्परिणाम याबाबत त्यांनी सविस्तर माहिती दिली.
हरेर यांच्या अभ्यासपूर्ण मांडणीतून या विषयावरील त्यांची सखोल जाण विद्यार्थ्यांना अनुभवता आली. या उपक्रमामुळे विद्यार्थ्यांमध्ये शेतीबद्दल सकारात्मक दृष्टिकोन निर्माण होऊन पर्यावरणपूरक शेतीची गोडी लागेल, असा विश्वास व्यक्त करण्यात आला.
या कार्यक्रमाला प्राचार्य श्री. एम. एम. नागुर्डेकर, पर्यवेक्षिका सौ. व्ही. जे. शेलार, श्री. पाटील-अर्दाळकर आदी मान्यवर उपस्थित होते. कार्यक्रमाचे आयोजन पर्यावरण विभाग प्रमुख श्री. एस. वाय. भोये व सौ. ए. एस. गुरव यांनी केले
