नाशिक जिल्हा प्रतिनिधी – योगेश बोचरे (७३०४६१२८७९)
नाशिक: पेठ रस्त्यावरील तवली फाटा येथे रस्त्यालगतच्या मोकळ्या जागेत उसाच्या रसाचा गाडा चालविणाऱ्या दहावीच्या विद्यार्थ्यांचा कारच्या धडकेत दुर्दैवी मृत्यू झाल्याची घटना रविवारी दुपारी घडली.
मयूर सुरेश भोये (वय १५, रा. लक्ष्मणनगर, तवली फाटा, पेठ रोड) असे मृत्युमुखी पडलेल्या विद्यार्थ्यांचे नाव आहे. डोळ्यांसमोर मुलाचा मृत्यू झाल्याने सुरेश यांनी हंबरडा फोडल्याने पोलिसांसह सर्वांचेही डोळे पाणावले. मयूरची दहावीची परीक्षा सुरू होती. उच्च शिक्षणासह चांगल्या पगाराच्या नोकरीचे स्वप्न उराशी बाळगून तो अभ्यास करीत होता. मात्र, नियतीने सारं हिरावल्याचे म्हणत मयूरच्या वडिलांनी भावनांना वाट करून दिली.
पोलिसांनी दिलेल्या माहितीनुसार, रविवारी (दि. २२) दुपारी चारच्या सुमारास मयूर वडिलांसोबत उसाचा रस तयार करणाऱ्या गाडीवर काम करीत होता. मुख्य रस्त्यापासून थोडे लांब एका मोकळ्या जागेत त्यांची उसाच्या रसाची गाडी आहे. सुटीच्या दिवशी मयूर वडिलांना कामात मदत करीत असताना भरधाव कारने (एमएच १५/केके ६४६४) त्याला धडक दिली. वडिलांनी तातडीने मयूरला रिक्षातून जिल्हा शासकीय रुग्णालयात दाखल केले. मात्र, तत्पूर्वीच त्याचा मृत्यू झाला. संशयित कारचालकाला ताब्यात घेतले असून, चौकशी सुरू आहे.
