कणकवली | प्रतिनिधी –
कणकवली शहरातील शिवशक्तीनगर परिसरातील प्रलंबित कामांची पाहणी नगराध्यक्ष संदेश पारकर व उपनगराध्यक्ष सुशांत नाईक यांनी केली. दोन दिवसांपूर्वी नागरिकांनी नगराध्यक्षांची भेट घेऊन प्रभागातील विविध समस्या मांडल्या होत्या. त्यानंतर तातडीने दोन्ही पदाधिकाऱ्यांनी परिसराला भेट देत प्रत्यक्ष पाहणी केली.
शिवशक्तीनगरमध्ये रस्ते, गार्डन, गटारे, वीजपुरवठा तसेच कचऱ्याच्या समस्या प्रामुख्याने असल्याचे नागरिकांनी बैठकीत मांडले. यावेळी नगराध्यक्ष व उपनगराध्यक्ष यांनी रहिवाशांसोबत प्रभागात फेरफटका मारून परिस्थितीची पाहणी केली.
प्रभागातील काही ठिकाणी तातडीने लाईट व स्वच्छतेसंदर्भातील उपाययोजना करण्यात येतील, तसेच उर्वरित प्रमुख समस्या लवकरच मार्गी लावण्यात येतील, असे आश्वासन नगराध्यक्ष संदेश पारकर व उपनगराध्यक्ष सुशांत नाईक यांनी दिले.
यावेळी नगराध्यक्ष संदेश पारकर, उपनगराध्यक्ष सुशांत नाईक, नगरपंचायत कर्मचारी तसेच शिवशक्तीनगर येथील रहिवासी मोठ्या संख्येने उपस्थित होते.
