कणकवली | प्रतिनिधी
भिरवंडे, सिंधुदुर्ग जिल्हा येथील पूनाळवाडी परिसरातील रस्त्याच्या खडीकरण व डांबरीकरणासाठी १० लाख रुपयांचा निधी मंजूर करण्यात आला आहे. संदेश उर्फ गोट्या सावंत (नवनिर्वाचित जि.प. सदस्य) यांच्या पाठपुराव्यामुळे हा निधी मंजूर झाला असून त्यांच्या आणखी एका आश्वासनाची पूर्तता झाल्याचे ग्रामस्थांनी सांगितले.
कनेडी भिरवंडे गावातील विकासकामांसाठी निधीचा ओघ सुरूच असून नितेश राणे यांच्या माध्यमातून तसेच संदेश उर्फ गोट्या सावंत यांच्या प्रयत्नांमुळे हा निधी उपलब्ध झाला आहे.
या निधीतून श्री. जगन्नाथ दिनकर सावंत यांच्या घरापासून ते श्री. नामदेव राजाराम सावंत यांच्या घरापर्यंत शेरडकरवाडी कडे जाणाऱ्या रस्त्याचे खडीकरण व डांबरीकरण करण्यात येणार आहे. हे काम सन २०२५–२६ च्या सर्वसाधारण जिल्हा वार्षिक योजनेतून मंजूर करण्यात आले आहे.
यापूर्वीही गावातील स्ट्रीट लाईटसाठी ४३ विद्युत खांब मंजूर करण्यात आले आहेत. गावाच्या विकासासाठी संदेश सावंत सातत्याने प्रयत्न करत असल्याचे ग्रामस्थांनी सांगितले.
भिरवंडे गावच्या विकासासाठी असलेली त्यांची तळमळ पाहून ग्रामस्थांनी समाधान व्यक्त केले असून संदेश उर्फ गोट्या सावंत यांच्या पाठीशी राहण्याचा ठाम निर्धारही व्यक्त केला आहे.
