पाथरी तालुका (प्रतिनिधी):विशाल डोंगरे. जागतिक महिला दिनाचे औचित्य साधून पाथरी तालुक्यातील गुंज येथे संकल्प मानव विकास संस्थेच्या वतीने एका विशेष सन्मान सोहळ्याचे आयोजन करण्यात आले होते. “शिक्षण आणि सुरक्षिततेसाठी पाऊल उचलणाऱ्या कर्तृत्ववान महिलांचा गौरव” या विषयावर आधारित असलेल्या या कार्यक्रमात, ऊसतोडणीसाठी जाताना मुलांना सोबत न नेता गावातच शिक्षणासाठी ठेवणाऱ्या धाडसी मातांचा तसेच मजूरी करून मुलांना शिक्षणाच्या प्रवाहात आणणाऱ्या माता यांचा विशेष सन्मान करण्यात आला.कार्यक्रमाची सुरुवात क्रांतीज्योती सावित्रीबाई फुले व डॉ. बाबासाहेब आंबेडकर, माता रमाई यांच्या प्रतिमेला अभिवादन करून करण्यात आली. यावेळी संकल्प संस्थेच्या शामल शेरकर मॅडम यांनी उपस्थित महिलांना मोलाचे मार्गदर्शन केले. आपल्या भाषणात त्या म्हणाल्या की, “स्त्री ही केवळ घराचा आधार नसून ती समाजाच्या बदलाचा केंद्रबिंदू आहे. ज्या मातांनी स्थलांतराचे कष्ट सोसूनही मुलांच्या शिक्षणासाठी त्यांना गावात ठेवण्याचा निर्णय घेतला, तसेच काम कष्ट करून त्यांनी खऱ्या अर्थाने सावित्रीच्या लेकी असल्याचा वारसा जपला आहे. मुलांचे शिक्षण आणि सुरक्षा हीच उद्याच्या सक्षम समाजाची पायाभरणी आहे.”अन्नपूर्णा आणि सुरक्षा रक्षकांचा सन्मान:यावेळी केवळ ऊसतोड कामगार माताच नव्हे, तर सर्व मजूर वर्गातल्या महिला व क्रीडा क्षेत्रात आपल्या मुलीला वेळोवेळी मार्गदर्शन करून प्रोत्साहन दिल्याबद्दल गावातील CRP सपना राणोजी धोतरे तसेच गावातील अंगणवाडी सेविका, मदतनीस, आशा वर्कर आणि हंगामी वस्तीगृहातील स्वयंपाकी महिलांचाही गौरव करण्यात आला. वस्तीगृहातील मुलांना मायेची ऊब देऊन त्यांचे पोषण करणाऱ्या महिलांचा ‘अन्नपूर्णा’ म्हणून सत्कार करण्यात आला. सर्व सन्मानित महिलांना फुलांचे गुच्छ देऊन गौरविण्यात आले कार्यक्रमामुळे गुंज गावात महिलांच्या सक्षमीकरणाचा आणि मुलांच्या शिक्षणाचा एक नवा जागर पाहायला मिळाला. तसेच संकल्प संस्थेचे समन्वयक बालासाहेब खोपे सर यांनी ही डॉ. बाबासाहेब आंबेडकर यांचे विचार,हिंदु कोडबील समजावून मोलाचे योगदान मातांना महिला दिनाचे महत्त्व समजावून सांगून शुभेच्छा दिल्या . या प्रकारे हा कार्यक्रम चांगल्या प्रकारे पार पडला.
