🔴 जागतिक महिला दिनानिमित्त जे. पी. नाईक पतसंस्थेकडून श्रमिक महिलांचा गौरव

आजरा : प्रतिनिधी
शिक्षणतपस्वी जे. पी. नाईक नागरी सहकारी पतसंस्था, आजरा आणि चैतन्य सृजन व सेवा संस्था, आजरा यांच्या संयुक्त विद्यमाने जागतिक महिला दिनानिमित्त श्रमिक महिलांचा सत्कार समारंभ उत्साहपूर्ण वातावरणात संपन्न झाला. हा कार्यक्रम सोमवार, दि. ९ मार्च २०२६ रोजी सायंकाळी ५ ते ६ या वेळेत आयोजित करण्यात आला होता.
कार्यक्रमाची सुरुवात पतसंस्थेचे अध्यक्ष प्रा. डॉ. शिवशंकर उपासे यांच्या स्वागत व प्रास्ताविकाने झाली. त्यांनी जागतिक महिला दिनाचे महत्त्व सांगत समाजाच्या प्रगतीमध्ये महिलांचे मोलाचे योगदान अधोरेखित केले. तसेच महिलांच्या आर्थिक साक्षरतेचे महत्त्व स्पष्ट करत पतसंस्थेच्या विविध योजना व सुविधांची माहिती उपस्थितांना दिली.
यानंतर सौ. अनुष्का गोवेकर यांनी “महिला दिनाचे स्वरूप व विशेष” या विषयावर मार्गदर्शन करत महिलांच्या कर्तृत्वाचा गौरव केला. समाजाच्या सर्वांगीण प्रगतीत महिलांची भूमिका अत्यंत महत्त्वाची असून त्यांच्या सन्मान व सक्षमीकरणासाठी समाजाने पुढाकार घेणे आवश्यक असल्याचे त्यांनी सांगितले.
यावेळी विविध क्षेत्रात परिश्रम घेणाऱ्या श्रमिक महिलांचा सत्कार करण्यात आला. सत्कारमूर्तींमध्ये शोभा परीट, निता परीट, शालन शिंदे, शिल्पा परीट, संजीवनी कांबळे, शीला कांबळे, सविता पवार, संगीता जाधव, वैशाली सुतार, सुशीला जाधव व जनाबाई सुतार यांचा समावेश होता.
यावेळी संस्थेचे उपाध्यक्ष मा. सुभाष विभुते व श्रीमती मीना शीरगुप्पे यांनी मनोगत व्यक्त करत सन्मानित महिलांचे कौतुक केले व त्यांच्या पुढील वाटचालीस शुभेच्छा दिल्या.
कार्यक्रमाच्या शेवटी डॉ. अंजनी देशपांडे यांनी आभार प्रदर्शन केले. या कार्यक्रमास संस्थेच्या संचालिका पुष्पलता घोळसे, सुधा उपासे, भारती सूर्यवंशी, अपर्णा उपासे, सारिका बटकडली, नेहा पाटील, संचालक मनोज गुंजाटी, संस्था व्यवस्थापक संतोष जाधव तसेच परिसरातील महिला मोठ्या संख्येने उपस्थित होत्या.
कार्यक्रमाचे सूत्रसंचालन चैतन्य सृजन सेवा संस्थेच्या संचालिका वैशाली वडवळेकर यांनी केले.