लातूर प्रतिनिधी –
कोरोना महामारीच्या अत्यंत कठीण व अभूतपूर्व परिस्थितीत संपूर्ण देशासह लातूर जिल्ह्यात देखील पोलीस दलाने नागरिकांच्या सुरक्षेसाठी व कायदा-सुव्यवस्था अबाधित राखण्यासाठी अहोरात्र कर्तव्य बजावले. कोरोना संसर्गाचा धोका मोठ्या प्रमाणावर असतानाही पोलीस अधिकारी व अंमलदारांनी कोणतीही भीती न बाळगता रस्त्यावर उतरून नागरिकांचे संरक्षण, लॉकडाऊनची प्रभावी अंमलबजावणी, जमावबंदीचे पालन तसेच अत्यावश्यक सेवांचा सुरळीत पुरवठा होण्यासाठी महत्त्वाची भूमिका पार पाडली.
या कालावधीत नागरिकांच्या सेवेसाठी कर्तव्य बजावत असताना लातूर पोलीस दलातील पोलीस अमलदार राजकुमार शिवाजी लोखंडे यांना कोरोनाची लागण होऊन दिनांक २१/११/२०२० रोजी त्यांचा दुर्दैवी मृत्यू झाला होता. आपल्या कर्तव्यनिष्ठा, समर्पण व समाजसेवेच्या भावनेतून त्यांनी दिलेले हे बलिदान पोलीस दलासाठी तसेच समाजासाठी अत्यंत प्रेरणादायी असून त्यांचे योगदान सदैव स्मरणात राहणारे आहे. महाराष्ट्र शासनाच्या निर्णयानुसार कर्तव्यावर असताना कोरोनाची लागण होऊन मृत्यू झालेल्या पोलीस कर्मचाऱ्यांच्या कुटुंबियांना प्रत्येकी ५० लाख रुपयांचे सानुग्रह अनुदान देण्याची तरतूद करण्यात आलेली आहे. त्याअनुषंगाने आज रोजी पोलीस अधीक्षक श्री. अमोल तांबे यांच्या हस्ते संबंधित मयत पोलीस अमलदारांच्या कुटुंबियांना ५० लाख रुपयांच्या आर्थिक मदतीचा धनादेश प्रदान करण्यात आला.
यावेळी पोलीस अधीक्षक श्री. अमोल तांबे यांनी कोरोना महामारीच्या काळात जीवाची पर्वा न करता कर्तव्य बजावत असताना प्राणांची आहुती देणाऱ्या पोलीस कर्मचाऱ्यांना भावपूर्ण श्रद्धांजली अर्पण केली. तसेच पोलीस अधीक्षक कार्यालय, लातूर यांच्यामार्फत पोलीस अधीक्षक श्री. अमोल तांबे यांच्या मार्गदर्शनाखाली सदर मयत पोलीस अमलदारांच्या संदर्भातील सानुग्रह अनुदानाचा प्रस्ताव शासनाकडे सादर करून त्याचा सातत्याने पाठपुरावा करण्यात आला होता. पोलीस अधीक्षक यांनी यावेळी व्यक्त केले की, अशा कठीण प्रसंगी पोलीस विभाग संबंधित कुटुंबियांच्या दुःखात सहभागी असून त्यांच्या पाठीशी ठामपणे उभा आहे. शासनाकडून मिळालेल्या या आर्थिक मदतीमुळे कुटुंबियांना काही प्रमाणात दिलासा मिळेल तसेच त्यांच्या भविष्यासाठी आर्थिक आधार मिळेल, असा विश्वासही त्यांनी व्यक्त केला.
लातूर पोलीस दल आपल्या कर्तव्यनिष्ठ सहकाऱ्यांच्या कुटुंबियांच्या पाठीशी सदैव उभे आहे मत यावेळी व्यक्त करण्यात आले.
