प्रतिनिधी :~ दत्तात्रय यादव
यवत पोलीस स्टेशनच्या गुन्हे शोध पथकाने आणि स्थानिक गुन्हे शाखेने LCB संयुक्तरित्या मोठी कारवाई करत खुनासह दरोडा आणि दोन ‘मोक्का’ गुन्ह्यांत फरार असलेल्या सराईत गुन्हेगारासह त्याच्या साथीदारांना अटक केली आहे. या कारवाईमुळे यवत आणि उरळी कांचन परिसरातील घरफोडीचे तब्बल १० गुन्हे उघडकीस आले असून, चोरीचा माल विकत घेणाऱ्या सराफ व्यावसायिकालाही पोलिसांनी बेड्या ठोकल्या आहेत.
६ जानेवारी २०२६ रोजी पहाटे वाखारी ता. दौंड येथील एका घराचा कडी-कोयंडा उचकटून चोरट्यांनी १.९८ लाख रुपयांचे दागिने आणि रोख रक्कम चोरली होती. तसेच सावंत सुभाष शेळके यांच्या घरातही चोरीचा प्रयत्न झाला होता. याप्रकरणी यवत पोलीस ठाण्यात गुन्हा दाखल करण्यात आला होता.
अशी झाली अटक
पोलीस निरीक्षक नारायण देशमुख आणि गुन्हे शोध पथकाचे अधिकारी सीसीटीव्ही फुटेज व गोपनीय बातमीदारांच्या मदतीने तपास करत होते. तपासादरम्यान पोलीस हवालदार गुरुनाथ गायकवाड आणि विकास कापरे यांना संशयित आरोपीबाबत खात्रीशीर माहिती मिळाली. त्यावरून पोलिसांनी सापळा रचून रुकुल उर्फ अमर दशरथ चव्हाण वय ३१, रा. न्हावरा याला ताब्यात घेतले.
कठोर चौकशीत त्याने आपल्या साथीदारांसह गुन्ह्याची कबुली दिली. त्यानंतर पोलिसांनी त्याचे साथीदार महेश संभाजी भोसले वय २२, रा. अहिल्यानगर आणि अमोल शास्त्री भोसले वय २०, रा. न्हावरा यांना अटक केली. तसेच चोरीचा माल विकत घेणारा सराफ किरण विलास बुऱ्हाडे रा. अहिल्यानगर यालाही पोलिसांनी अटक केली आहे.
आरोपीचा गुन्हेगारी इतिहास
मुख्य आरोपी रुकुल चव्हाण हा सराईत गुन्हेगार असून त्याच्यावर दरोडा, घरफोडी आणि आर्म ॲक्टचे एकूण १० गुन्हे दाखल आहेत. विशेष म्हणजे, सातारा जिल्ह्यातील उंब्रज आणि शिरूर पोलीस ठाण्यांतर्गत त्याच्यावर ‘मोक्का’ MCOCA कायद्यान्वये कारवाई करण्यात आली होती आणि तो या दोन्ही गुन्ह्यांत फरार होता.
उघडकीस आलेले गुन्हे:
यवत पोलीस स्टेशन सीमा: ०६ घरफोड्या
उरळी कांचन पोलीस स्टेशन सीमा: ०४ घरफोड्या एकूण १० गुन्हे उघड
”सराईत गुन्हेगारांना जेरबंद केल्यामुळे परिसरात गुन्हेगारीवर वचक बसेल. नागरिकांनी आपल्या परिसरात संशयास्पद हालचाली दिसल्यास तात्काळ पोलिसांशी संपर्क साधावा.”
— यवत पोलीस प्रशासन
ही कारवाई पुणे ग्रामीण पोलीस अधीक्षक संदीपसिंह गिल, अपर पोलीस अधीक्षक गणेश बिरादार आणि उपविभागीय पोलीस अधिकारी बापुराव दडस यांच्या मार्गदर्शनाखाली यवत पोलीस आणि स्थानिक गुन्हे शाखेच्या पथकाने यशस्वीरित्या पार पाडली.
