बस थांबविणे बंद केल्याने प्रवाशांची गैरसोय; तातडीने तोडगा काढण्याची मागणी
आजरा : प्रतिनिधी,
गारगोटी ते नागनवाडी या नवीन रस्त्याचे काम सध्या प्रगतीपथावर आहे. या रस्ता रुंदीकरणामध्ये बटकणंगले गावातील जुना बस थांबा (पिकअप शेड) पाडण्यात आला आहे. त्यामुळे प्रवाशांची गैरसोय टाळण्यासाठी गावातील ‘आजरा रोड फाट्या’वर कायमस्वरूपी नवीन बस थांबा मंजूर करावा, अशी मागणी ग्रामपंचायतीने एसटी प्रशासनाकडे केली आहे.
अनेक गावांसाठी सोयीचे ठिकाण
जुना थांबा पाडल्यानंतर तिथून अवघ्या २०० मीटर अंतरावर असलेल्या आजरा रोड फाट्यावर नवीन थांबा होणे गरजेचे आहे. हे ठिकाण केवळ बटकणंगले गावासाठीच नव्हे, तर परिसरातील खालील गावांच्या प्रवाशांसाठी अत्यंत सोयीचे आहे:
सावंतवाडी, जांभूळवाडी, वाघराळी
बिद्रेवाडी, हेळेवाडी, हेब्बाळ-जलद्याळ
हंदेवाडी, कोळीद्रे, कोट, कळविकट्टी आणि दड्डी.
याठिकाणी सार्वजनिक बांधकाम विभागाची (P.W.D.) पुरेशी जागा उपलब्ध असून, भविष्यात मुख्य रस्त्याच्या दुतर्फा वाढणारी वस्ती लक्षात घेता हे मध्यवर्ती ठिकाण ठरणार आहे.
एसटी प्रशासनाचे दुर्लक्ष?
प्रवाशांची ही मागणी लक्षात घेऊन बटकणंगले ग्रामपंचायतीने १३ मार्च २०२६ रोजी विभाग नियंत्रक (कोल्हापूर) आणि आगार व्यवस्थापक (गडहिंग्लज) यांना लेखी निवेदन दिले आहे. मात्र, गेल्या दोन-तीन दिवसांपासून एसटी प्रशासनाने या नवीन जागेवर बस थांबविणे अचानक बंद केले आहे. ऐन उन्हाळ्यात बस थांबत नसल्याने विद्यार्थी, महिला आणि ज्येष्ठ नागरिकांना नाहक त्रास सहन करावा लागत आहे.
ग्रामपंचायतीने अंतर्गत वाद मिटवून पत्र द्यावे
“बटकणंगले ग्रामपंचायतीने बस थांब्याबाबतचा गावातील वाद मिटवून आम्हाला अधिकृत पत्र द्यावे, त्यानंतर पुढील कार्यवाही केली जाईल.”
— श्री. रने, (गडहिंग्लज एसटी डेपो)
प्रवाशांची वाढती संख्या आणि रस्ता रुंदीकरणानंतर उद्भवलेली परिस्थिती पाहता, एसटी प्रशासनाने तांत्रिक बाबींमध्ये न अडकता प्रवाशांच्या हितासाठी याठिकाणी तात्काळ बस थांबा सुरू करावा, अशी जनभावना व्यक्त होत आहे.
