📚 “पुस्तकांची गुढी उभारून नववर्षाचे स्वागत; चंदगडच्या न्यू इंग्लिश स्कूलचा प्रेरणादायी उपक्रम”

चंदगड /आजरा: प्रतिनिधी,
नववर्षाच्या स्वागतासाठी पारंपरिक गुढीपाडवा सणाला यंदा एक आगळावेगळा आणि प्रेरणादायी आयाम देत दि न्यू इंग्लिश स्कूल, चंदगड येथे “वाचन संस्कृतीची गुढी” उभारण्यात आली. विद्यार्थ्यांमध्ये वाचनाची आवड निर्माण व्हावी, या उद्देशाने पुस्तकांची आकर्षक गुढी उभारून शाळेने एक अभिनव उपक्रम राबवला.
या गुढीचे पूजन विद्यालयाचे प्राचार्य आर. पी. पाटील यांच्या हस्ते करण्यात आले. यावेळी भारतीय संविधान या महत्वपूर्ण ग्रंथाचे विशेष पूजन करून विद्यार्थ्यांना लोकशाही मूल्यांची जाणीव करून देण्यात आली.
उभारण्यात आलेल्या गुढीत विश्वकोष, रामायण, महाभारत, ज्ञानेश्वरी, तुकाराम गाथा, विविध शब्दकोश, विज्ञान विषयक पुस्तके तसेच चरित्र आणि आत्मचरित्र यांचा समावेश करण्यात आला होता. या माध्यमातून विद्यार्थ्यांसमोर ज्ञानाचा खजिना उभा करण्यात आला.
प्राचार्य आर. पी. पाटील यांनी विद्यार्थ्यांना मार्गदर्शन करताना वाचनाचे महत्त्व अधोरेखित केले. “वाचनामुळे विचार समृद्ध होतात आणि व्यक्तिमत्व घडते,” असे त्यांनी सांगितले.
या उपक्रमाच्या यशस्वी आयोजनासाठी शिक्षक संजय साबळे, ग्रंथपाल शरद हदगल आणि ओंकार पाटील यांनी विशेष परिश्रम घेतले. या अभिनव उपक्रमाचे सर्व स्तरांतून कौतुक होत असून, विद्यार्थ्यांमध्ये वाचनाची प्रेरणा निर्माण झाली आहे.