शहाद्यात टीचर्स प्रीमियर लीग; आ. राजेश पाडवी यांच्या हस्ते सिझन थ्रीचे उद्घाटन

शहादा, दि. २२ (प्रतिनिधी) 🖊️

शिक्षकांमधील खेळाडूंना व्यासपीठ उपलब्ध करून देणाऱ्या बहुप्रतिक्षित टीचर्स प्रीमियर लीग (TPL) 2026 – सिझन थ्रीचा शहादा येथे उत्साहात प्रारंभ झाला. पूज्य साने गुरुजी विद्या प्रसारक मंडळाच्या क्रीडांगणावर आयोजित या स्पर्धेचे उद्घाटन आमदार Rajesh Padvi यांच्या हस्ते करण्यात आले.

यावेळी जिल्हा क्रिकेट असोसिएशनचे अध्यक्ष प्रा. मकरंद पाटील यांच्या हस्ते खेळपट्टीचे पूजन करण्यात आले. मंडळाचे अध्यक्ष दीपकभाई पाटील यांच्या संकल्पनेतून व समन्वयक प्रा. मकरंद पाटील यांच्या मार्गदर्शनाखाली या स्पर्धेचे आयोजन करण्यात आले आहे.

उद्घाटनप्रसंगी आमदार पाडवी यांनी स्पर्धेच्या भव्य चषकाचे अनावरण केले. यावेळी प्राचार्य डॉ. एम. के. पटेल, एपीआय निलेश गायकवाड, क्रीडा संचालक डॉ. अरविंद कांबळे, सचिव डॉ. महेश जगताप, प्रा. डॉ. जितेंद्र माळी आदी मान्यवर उपस्थित होते.

उद्घाटनावेळी बोलताना आ. पाडवी म्हणाले की, “सुट्टीच्या दिवशी सहसा नोकरदार वर्ग पर्यटनाला प्राधान्य देतो; मात्र येथे शिक्षक मोठ्या संख्येने मैदानात खेळताना दिसत आहेत, ही अत्यंत आनंदाची बाब आहे. शिक्षकांच्या या सहभागामुळे विद्यार्थीदेखील क्रीडेकडे आकर्षित होतील, ज्यातून त्यांच्या शारीरिक आणि बौद्धिक विकासाला चालना मिळेल.”

दि. २० मार्च ते २२ मार्च २०२६ या कालावधीत चालणाऱ्या या स्पर्धेत उत्तर महाराष्ट्रातील विविध भागांतून शिक्षक खेळाडूंनी सहभाग नोंदवला आहे. अप्सरा फायटर, छत्रपती वॉरियर्स, अक्राणी वॉरियर्स, श्रीराम वॉरियर्स, टीचर सुपर किंग्स, एफ.सी.सी. लायन्स, एफ.सी.सी. हंटर्स आणि बिस्की रॉयल्स अशा संघांमधून शहादा, नंदुरबार, तळोदा, अक्कलकुवा, धडगाव, नवापूर व शिरपूर येथील एकूण १२३ शिक्षक खेळाडू आपले कौशल्य दाखवत आहेत.

स्पर्धेतील विजेत्या संघांना पारितोषिके देण्यात येणार असून सर्व सहभागी खेळाडूंना आकर्षक मेडल, टी-शर्ट आणि कॅप्स देऊन सन्मानित करण्यात आले आहे.

कार्यक्रमाचे प्रास्ताविक प्राचार्य डॉ. एम. के. पटेल यांनी केले, सूत्रसंचालन डॉ. अरविंद कांबळे यांनी केले, तर आभार प्रदर्शन डॉ. महेश जगताप यांनी केले. पंच म्हणून आशिष सोनवणे, ओंकार पवार, प्रदीप कोळी व बबलू यादव यांनी काम पाहिले.

ही स्पर्धा यशस्वी करण्यासाठी प्रा. डॉ. अनिल बेलदार, डॉ. खुमानसिंग वळवी, डॉ. जितेंद्र माळी, सुनील भांडारकर, स्वप्नील जैन तसेच क्रीडा विभागाच्या सर्व कर्मचाऱ्यांनी विशेष परिश्रम घेतले आहेत.