पनवेल
पनवेल महानगरपालिका क्षेत्रातील कळंबोली प्रभाग क्र. 7 रोडपाली गाव जवळील तलावाच्या बाजूस असलेल्या नाल्याच्या पुलाशेजारी अंदाजे 70 ते 80 झोपड्या अनधिकृतपणे उभारण्यात आलेल्या आहेत. त्यामुळे सदर परिसराचे मोठ्या प्रमाणावर विदृपीकरन झालेले असून स्वच्छता, सुरक्षितता व सार्वजनिक आरोग्याच्या दृष्टीने गंभीर समस्या निर्माण झालेल्या आहेत. तसेच या ठिकाणी अनधिकृत व बेकायदेशीर कृत्ये सुरु असण्याची शक्यता नाकारता येत नाही.
कळंबोली रोडपाली शहरांमधील अनधिकृत बांधकामे, बेकायदेशीर होर्डिंग्ज,पार्किंग आणि अतिक्रमणांमुळे शहराचे नियोजन कोलमडून पडले असून शहराचे विद्रुपीकरण होत होत आहे. स्वच्छ भारत अभियानाला गालबोट लागत आहे. प्रशासनाच्या सुस्त धोरणामुळे फुटपाथ, रस्ते आणि मोकळ्या जागांवर बेकायदेशीर ताबा मिळवला जात आहे. यामुळे शहराचे सौंदर्य नष्ट होत आहे.
सदर बाब अत्यंत गंभीर स्वरूपाची असून प्रभाग 7 मधील रोडपाली गाव तलावाच्या बाजूस असलेल्या नाल्याच्या पुलाशेजारी अनधिकृतपणे उभारण्यात आलेल्या झोपड्यांवर उच्च न्यायालयाच्या आदेशानुसार, पनवेल महानगरपालिकेने तात्काळ अतिक्रमण विभागामार्फत कारवाई करून त्या निष्कासित करण्यात याव्यात अशी विनंती नगरसेविका मनाली अमर ठाकूर यांनी पनवेल महानगर पालिकेचे महापौर नितीन पाटील यांच्याकडे केली आहे.
